الكلمة الأخيرة (( صوتية و هطول أول ))

بسم الله الرحمن الرحيم

دعيت إلى رياضكم

فلبيت

فهل لي مكان بينكم

يا المها ضاع العمر و الموت جاني=كيف ابحيا دون حبك يا الأميره
و الله اني ما سليتك يا حناني=في بعادك هلت دموعي غزيره
انطفت شمسي و ليلي منه اعاني=سارح بفكري و عايش وسط حيره
صرت اهوجس أرتجي ذيك الأماني=صعب نسيانك و روحي لك أسيره
بي خفوق ٍ يرتعش بين الــمحاني=يشتكي برد الفراق و زمهريره
يا عذابه علميني لا رجاني=لا استجار من الألم من هو يجيره
آه من عد الدقايق و الثواني=و آه يا روح ٍ غدت بعدك كسيره
كني المجنون ضايع في مكاني=في سديم ٍ وين يا قلب المسيره
يشهد الله غير دمعي ما لفاني=و ياهي لحظات ٍ على عيني عسيره
تذرف الدمعة بلون ٍ أقحواني=كنها الجمرة من النار السعـيره
ما رحم عيني إلين انه عماني=و كل ما جففته الذكرى تثيره
أعترف لك حبك احزان ٍ ملاني=و الهوى يا منيتي يعمي البصيره
كم نهرت القلب و لكنه عـصاني=قال ابحيا لو على ذكرى مريره
مستحيل انسى و ابيع اللي شراني=لا و لا ارضى غيرها ذيك العشيره
عشقها نبضي و لو مرٍّ سقاني=و الجراح تهون و ان صارت كثيره
ذا قراري و انت وصِّف بالمعاني=قلت ما عندي سوى كلمة أخيره
توصف احساس ٍ تفجر في كياني=و ثار في صدري كما البحر و هديره
يا مها ما انساك لو نبضك نساني=في ثنايا الروح لك ملقى و ديره
محتفظ فيكي شذا عطر و أغاني=و انتشيبك كلما هفهف عبيره
و اعشقك عشق السفينه للمواني=و لو يسود الليل نجمك لي ينيره