محمد جارالله السهلي يتفاعل مع قضية الشابين فهد وسعود

يالله ياعالم خفى الانفـس وماكـن الضميـر=تشكي عليـك الخلـق بلواهـا وقـو الامهـا
ياللي عبادك تحت ظلـك تستظـل وتستجيـر=من حر شمس عيوبهـا وذنوبهـا وآثامهـا
نلوذ بك عن شر بقعا اللي رحاهـا تستديـر=ونعوذبك من فتنـة الدنيـا وسـو اوهامهـا
تغرنا في غيهـا والعمـر محـدود وقصيـر=ومرد الانفس للقبـر مهمـا تطـول ايامهـا
بشر ويجذبنا لتكرار الخطـى سلـك الحريـر=نورك مبين ومن جهل نشفق علـى ظلامهـا
ولاينفع الانسان في اليوم العبوس القنطريـر=الا فعـول الخيـر فـي دنيـاه كـم ارقامهـا
يـارب وفقنـا وسهلهـا ولاغيـرك نصيـر=لاغرغرت روح الابن آدم وبلشت بأنسامهـا
يامفرج الكربات و الضيقات والامـر العسيـر=فزعتك قدام القلوب تمـوت بيـض احلامهـا
جملني في عين الصغير من قبل عين الكبيـر=وساعد اهجوسي بمعانيها وحسـن الهامهـا
من دار اخو مريم عنيت احث رجلي للمسيـر=جيـت وطحاطيـح الرجـال وقفتـي قدامهـا
ودي بها في وضع ماهو نفس هذا الوضع مير=لايامنـا دوراتهـا وللـظـروف احكامـهـا
سلام ياهل الطيب والناموس والسيف الشطير=يانسل سـادات العـرب وابطالهـا وكرامهـا
ياهل القنى و اهل الثنى والعز والمجد الوفيـر=يـالابـةٍ مـقـام راس النايـفـه مقامـهـا
بقوم روس القوم والامجاد في فـي وهجيـر=عنوان عز الجيـره وسقـم العـدا وكعامهـا
ظهور السواني معلمين الترك معنى زمهريـر=جحافـلٍ قدامكـم شكـت بـرود عظامـهـا
اليا رضيتوا كل سنين الزمـن وجـهٍ سفيـر=واليا زعلتوا تزعل ايـام الزمـن واعوامهـا
وسلام يالسميان ياهل الخيل والصيت الشهير=صفوت ميادين الوغـى لاثـورت بأعسامهـا
آلاد سامي منبـع الطـالات لاصـاح النذيـر=ستر الهنوف اللي تعزوى في فعل ضرغامهـا
اليا ركبوا قب المهار ودكـوا الجمـع الغفيـر=تبرك زحازيح الرجـال وتعلـن استسلامهـا
لابة شرف من يعترضها بالردى ماهو بخيـر=من طيبها ضامت زمـان الشـده ولاضامهـا
اليا عطت كنها تغرف من جمة البحر الغزيـر=واليا خذت قـادت ذلـول الكايـده بخطامهـا
يامعتقت دم الدخيـل مجبـرة عظـم الكسيـر=انتـم خـوال المرجلـه والطايلـه عمامهـا
تكفون يارجال الكـرم اتجـاه الاول والاخيـر=تموا طلبنـا يامقابيـس الوغـى واعلامهـا
تكفون ياروس الرجال اللي تشور وتستشيـر=ردوا على ام اليتـم اغلـى واعـز ايتامهـا
تكفون يانطاحت القاله اهـل الخيـر الكثيـر=تجملوا في اللـي حضـر عوامهـا وحكامهـا
تكفى يافيصل تمها في يديك تحديـد المصيـر=ناسٍ تبي الجنه على هـاذي تحـث اقدامهـا
يابو سند مـال الكبيـره كـود رجـالٍ كبيـر=ومثلك سند للمعضـلات وشيخهـا وحزامهـا
تكفى عسى ينساقلك من جنة الخالـق بشيـر=يعوضـك الله بالجنـان الخالـده واختامـهـا
قل تم تكفى ياسليل المجد والصيـت الشهيـر=رجع على ام اليتـم اغلـى واعـز ايتامهـا