| |
20-08-2010, 02:23 PM
| ||||||||||||
| ||||||||||||
البخيل وسيع الوجه :p  السلام عليكم ورحمة الله الشهر عليكم مبارك  هذي سلمكم الله قصه قالتها لي جدتي الاسبوع الي راح واعجبتني وقلت اكتبها قبل لا انساها وبما اني كل شوي مشلحه منكم قصه وقايلتها لها قلت ارد الجميل وترى هذي اول مره اكتب هنا  هذي القصه قديييمه بالقليل قبل ميه وخمسين سنه كان فيه رجال تاااجر تمر في قريته كان يجيب التمر من القرى البعيده ويبيعها في قريته وكان معروف عنه انه غني لكن انه للاسف كان بخيل لابعد حد حتى على نفسه يقولون انه وصل ال50 ماتزوج عشان مايدفع مهر ويصرف زياده على زوجته وعياله وانه مايبي يتعب ويشتغل ويجمع في حلاله ويصرفونها هم  مع ان ربعه يقنعون فيه يافلان تزوج يا فلان تزوج من يومه صغير وهو رافض المهم انه مره جاه واحد من اخوياه وقاله يافلان ان فيه حرمه ضعيفه ترملت وهي صغيره وماعندها الا وليد ابو 3 سنين وانها مقطوعه من شجره ولا تبي منك ولا شي لا مهر ولا مصرف ولا شي ماتبي الا رجال يستر عليها ويربي ولدها ويجبيلها الي يسد ريقها عاد خوينا البخيل فكر قال اكسب فيها اجر وماتبي مهر وراضيه بالي بعطيها خلني اتزوجها والقى لي ونيس المهم تزوجها وقعدو 4 سنين ما تاكل هي ولدها الا تمرتين ثلاثه باليوم باقي بضاعته المهم انه مره من المرات بشهر رمضان خلص تمر محله واستعد انه يروح للقريه الي متعود ياخذ التمر منها يوم وصل لها مالقى فيها تمر وراح لقريه ابعد يوم وصل لينه العصر صلى وقعد وهو يقول في نفسه خلني اقعد لين يجي احد ويتصدق علي ويفطرني قعد شوي ويدخل المسجد ذاك الشاب المتين النظيف الي باينه عليه النعمه قال يالربع فطوركم اليوم علي, فرح خوينا وقعد يحتري اذان المغرب يوم اذن ويجي الشاب الي عزم اهل المسجد معه ناس بالقهاوي والتمور ويفطرهم يوم خلصو مصلين قال الولد نفسه يالربع من بغى يكمل فطوره حيكم الله في بيتي. المهم راح البخيل معه لبيته ولقاه الذبايح وحاط لهم من كل شكال ونوع وكل خير اكل وشبع ويوم جا بيطلع قال الولد نفسه ياجماعه الي منكم غريبن عن ديرتنا حياه الله على السحور الليله البخيل استغرب منه!! من ذا الي بيسحرنا عقب ذا الفطور ! المهم قعد وسيع الوجه خوينا وجاهم السحور يوم دخل لقاه حاط شي احسسن من الفطرو حاط كل الي يخطر على بال  من بكره راح البخيل للمحل الي بيشتري منه التمر وشرى تمره ويوم جا بيروح سئل راعي المحل قاله اني مستغرب من صاحب هذا البيت وش اسمه؟ قاله انه رجال اسمه قضاع ليه مستغرب؟. قال البخيل شفت وش سوى امس فطرنا وسحرنا وتكلف وانه مسررف مرره من هو ولد؟ قاله صاحب المحل انه هذا شغله كل يوم في رمضان وانه ماهوب صاحب جاه لكنه ورث فلوس على طبق من ذهب قال البخيل كيف! قاله انه كان فيه تاجر بخييييييييل وعقيم المهمه انه تزوج من مره عندها هالولد وكان بخيل على نفسه وعلى عياله ويوم مات ماورثه الا هالولد وصار كل رمضان على هالشغل قال البخيل زين وراح رجع لديرته اول ماوصل راح لمحل الخضار وشرى من كل نوع وارسل لبيته واخذ احسن التمر وارسله لبيته ودار على كل السوق وشرى احسن مافيه ويرسله البيته والي يوصلونه يطقون باب بيته يا ام افلان افتحي هذا من ابوكم يام افلان افتحي من ابوكم هي المسيكنه انهبلت وشلون ابونا وهو مسافر!! وشلون يجيب كل هالخير وهو معيشنا 4 سنين على تميرات!! وكل شوي جايهم احد ومدخل شي احسن من الي قبله لين دخل زوجها قالت له يافلان جوني ناس يقولون ذي الاغراض منك وش الي حصل ان شالله خير؟! قالها : نبي نبيد المال قبل يبيدنا .. قبل يجي قضاع وياكله خلصت القصه الرجال انفكت عقدته كان خايف من ولد زوجته يصير مثل قضاع ويضيع حلاله وهو ما استمتع فيه اذا اعجبتكم تقيموني الله يجزاكم خير م.ن 
 |
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ماهو الطب البديل | راعي سوريا | الوقاية خير من الف علاج | 3 | 14-05-2010 07:10 PM |
| مامدى ثقتكم في الطب البديل ؟ | ابو طارق | احتواء ما لا يحتوى | 11 | 03-12-2008 12:09 AM |
| ,, يا وسيع البال ضيقت الصدور / رحت ما علمتني وين أنت ساري ,, | خـالد الشمري | صهيل القصيد | 8 | 23-10-2008 06:35 PM |
| البديل | خالد00 | احتواء ما لا يحتوى | 12 | 11-09-2008 02:26 AM |
| الطب البديل | متعب3 | احتواء ما لا يحتوى | 9 | 19-05-2007 11:00 PM |
 |  |
العرض الشجري
