الاتكيــت الخليجي || ‘ السسْنـآـآعهـ ‘

بصراحة ماعرفت وين احطه... قلت ملي الا هالقسم وانتو اعرف يصلح لنآ حنآ للبنآت كثير بـ المره
طبعاً مو كل البنآت بس البنآت السنعآت إلي مثلي <السنآعه بجهه وأنآ بجهه






المهم ندخل بـ الموضوع ولآ نضيع الوقت






كثير من المنتديآت تتكلم عن الأتيكيت والأكتيكيت وكيف تصيرين أتيكيت و ... ألخ

يعني مآ تعرفين وشو الأتيكيت الخليجي ..؟!
وهي التي تندرج تحت أسم [ السنآعه ]






بـ النسبه لي و للكثير من البنآت مآ يعرف للسنآعه
للأنآ أكثر طلعآتنآ تكون بين الأهل والخوآت وإلي نمون عليهم بـ صفه عآمه ..






فـ المجآمله مآ تكون ذآك الزود بينك وبينهم






فآ في موضوعنآ هذآ رآح نتكلم عن [ الأتيكيت الخليجي ]






* يعني جوك نآس بـ البيت < مو إلي تمونين عليهم .. كيف تهلليلين فيهم ..؟





هلآ والله وغلآ ............... ....... و نسكت أو أسكت
بس اللحين بيختلف الوضع حنآ كبرنآ وكبرت عقولنآ
فـ لآزم نصير أتيكيت و كشخه بطريقه كلآمنآ و أسلوبنآ






فـ مثلاً :






♫♪ عطيتي أحد كآس مويه ..
قآلت لك : عشتِ ..
رديتِ : .." عآشت أيآمك "..







♫♪ أو قمتِ من النوم وكآن أحد أخوآنك حآب يستهبل وقآل ..:






صح النوم ..
رديتِ : .." صح بدنك ".. < لو أنآ هنآ قلت أقلب وجهك






♫♪ أو أحد سألك عن أسم عآئلتك ورديتِ وقلتِ اسم العآئله
قآل : و النعم فيك ..
رديتِ : .." مآ عليك زود ".. < أنآ هنآ أبتسم وأنطم






♫♪ أحد بآرك لك لـ سبب معي تردين وتقولين : .." الله يبآرك فيك و عقبآلك "..
<بس أنتبهي تقولين عقبآلك وهو صآير له هـ الشي






♫♪ أحد تزوج تقولين له :






.."ألفْ مبرُوكْ الله يَجمَعْ بِينكُم بِ الخِيرْ , مِنُه المَآلْ ومنِكْ العِيآلْ الله يبآرِكْ لِك بِزُوجِك وبِيتِك الله يسعدِكْ ويهَنيِك ويرزِقك بِ الذُريّة الصَآلحَة
الله يعمّر حَيآتكُم بِ المَحبّة وَ المودَة "..






♫♪ وحده ولدت تقولين لهآ :






.."الحمدْلله عَلَى سَلامتِك وَألفْ مبرُوك , الله يجعلُه مِنْ مَوآلِيدْ السَعَآدَة
ويتربَّى بِ عزِكم انْ شَاء الله , والله يرزقكُم برّه ويسَخرُه لكُم
الله يجعلُه مِنَ الصَآلحِينْ ويحفظُه لكُم مِنْ كلْ عِينْ "..






♫♪ رحتِ لوحده بـ المستشفى وش تقولين لهآ ..؟






.." طهُورْ إنْ شَآءْ الله ..
الله يشفِيكْ ويعَآفِيكْ ويرَجعِك لِبيتِكْ بِ السَلامَه , وإنْ شاء الله العُمرْ الطوِيل يَاربْ ..
وترجعِينْ بِ الصحّة وَالعَآفيَة وَأحسَنْ مِنْ أَوّل ..
والله يجعَل مَرضِك تَكفِيرْ لِ ذنُوبِك وَتعظِيْم لِ أَجرِكْ , مَا تشُوفِين شَرْ ..
وانْ شَاء الله تقُومِينْ بِ السَلامَة "..






♫♪ رحتِ تعزين و تبين توآسين أهل الميت تقولين ..:
.." عظّم الله أَجرِكْ , إنّا لله وإنّا إليه رَآجعُون , الله يرحمُه ويغفرْ له ..
ويجعَلْ قَبرُه رَوضَه مِنْ رِيَآض الجَنّة , آمِينْ يَآرَبْ العَآلمِينْ ..
اللهُمَ أغسِله بِالمَاء والثَلج والبَرَدْ ..
ونَقِه كَما يُنَقَى الثَوب الأبيَضْ مِنَ الَدَنسْ " وأدعية كثيرة " ..






♫♪ جوك ضيوف وتبين ترحبين فيهم .. تنسين الكلآم هلآ و غلآ وتوقفين لآ تقولين مثل كذآ ..:






.." هَلا وغَلا أسفَرَتْ وَأَنوَرتْ يَاالله انّ تَحيِيهُم
وتبقِيهُم وتمَسِيهُم بِ الخِيرْ وتصبَحهُم بِالسرُورْ تَو مَا نَوّر البيتْ تفَضلُوا تفضَلُوا >>شسمُه مُو كأنِي دخلتْ جَو "..






طيب جو النآس ورحبتي وهللتي فيهم وجلستيهم





أكيد بتضيفينهم
فـ اللحين بقول لك طريقه التضيف ..!







► أوّل شَيء تقدمِينْ لهُم " العصيرات " إذا كآن الجَو حَآرْ ..




كُوكتِيلْ , وَ عصِيرْ طَبيعِي طبعَاً غيُروا فِي العصِيرَآتْ عشَان مُمكِنْ مُو الكلْ يشرَبْ مَثلاً بُرتُقاَل وَلا الكُل يِشربْ تُفَّاحْ , فَ الأفضَلْ التَنوِيعْ ..
تَأكِدي أنهُم كلهُم شربُوا .. ولزّمِي عَليهْم ..





► تَبدأَ المَرحَلة الثَانيَة مِنْ الضِيَآفَة " القهوة " ..
فِي شَيء مُهمْ عِندَ القَهوَة ..
أَولْ شَيء لازِمْ لازِمْ لازِمْ يكُونْ مَعهَا " تَمرْ "
الشَيء الثَانِي .. انُه فِي نَآسْ عندهُم عَادَاتْ وتقَآلِيدْ
مَثلا : القهوَة إذَا جِيتِي تصبينهَا إمسكِي الدَلّة منْ اليسَآرْ وَالفنجَآلْ بِ اليمين .. >>يامَا أخذتْ لِي علقَه منْ الوآلدْ ..
وعَبِي نُص الفنجَآلْ أَو أقَلْ مِن النُص بِشوَي ..
لأنُه فِيه بَعضْ النَآسْ إذَا صَبيتِي لهُم الفنجَآلْ مَليآنْ مَعنَاتَها عندهُم ( إشربُوا وإخلصُوا وإطلعُوا بَرَى بِيتِي ) .. كأنها طردة .. لا تضحكُونْ وربِي ترَى فِي نَآسْ كِذا إلَى الآن , يعنِي الموضُوعْ مُو لعبْ ..
خصُوصَاً الشِيبَآنْ وَالعجَآيزْ والرجَآلْ أعتقدْ يهتَمُون بِ الأمور هذِي ..
والفنآجِيلْ لاتكُونْ صغِيرَه مّره يعنِي إختآرُوا من النُوع الوَسطْ يآ حبِي لكُمْ ..






عآدْ َتدرُونْ وشْ ألعَنْ مَوقفْ لمّا تصبِينْ قَهوَة ومَاسكَة الفنجَالْ وهِي حَآرّة بِيدّك ..
والضيُوفْ يسُولفُون يسُولفُووونْ وأنتِي مآدّة الفنجآلْ وتقُولِينْ تفضَلِي خَالتِي .. تفضضضضضضضضضضلِي .. تفضَلِي يَدِي حرَقَتنِي ..




و لمّا تقَدمِينْ الضِيَآفَة مُو كِلْ اللي فِي البيتْ يرُوحُونْ المَطبَخْ ..
لازِمْ أَحَدْ يَجلِسْ مَع الضيُوفْ , مَا ينفَعْ يطَولُون لحَآلهُمْ ..
و حلُو تحطُونْ حَلَى مَعَ القهوَة ..
أنَا متأكدَه أن الكلْ عَآرفْ هَالأشيَاءْ ..





► طيّبْ نرجَع مَرّة ثَآنيَة لِ الضيُوفْ المَرحَلَة الثَالثَة" الشاي " ..




أفضَلْ إنّك تسَوينْ إِبريقِينْ وَاحدْ لِ الشَآي وَالثَآنِي لِ النعنَآع ..
وأحسنْ بعدْ ماتكثرينْ السكّرْ وتجيبينْ سكّرْ برّى , عشَانْ هُم يضِيفُونه بِنفسَهُم ..
و إذَا بتحطُونْ العَشَاء بَدرِي خلُوا الشَاي بعدَ العشَاءْ ..
عشَانْ يصِيرْ فِي شَيء تضيفُون عَليه بَعدْ العَشَاء ..







ألحين رحبتي وضيفتي بآقي أيش ..؟!




كيف تتعآملين معآهم ..!





دآئماً حآولي تآخذين وتعطين مع الضيوف حتى لو كآنوآ جآيين لك [ أنتِ شخصياً ]
ولو كآنوآ الضيوف مو لك يعني لـ أمك أختك لـ جدتك وهكذآ يفضل أنك تكونين بنوته ع السآيلنت
لآ تتكلمين لين مآ أحد يبدأ معك ويتحدث إليك <لغه عآميه ع عربيه شي والله




السآيلنت : هو أنك تكونين مؤدبه و خلوقه وتستحين لأن الحيآء زينه للبنت .. وهـ فديتنآ بس
لكن الحيآء مآ يمنع أنك تتكلمين شوي وتحتكين مع الضيفه وخآصه لو كآن عندهآ شبآب
أمكن تعجب بـ اخلآقك وتخطبك كل شي جآيز




بس في نوعين من الحريم إلي لآ زم تحتكين ولآ لآ < يعني أقصد هنآ إلي عندهم شبآب




1.. الحرمه إلي تقول عن ولدهآ " والله وليدي مسيكين معذبته الجآمعه ليل ونهآر وكآرفته كرف " <هذي أحتكي فيهآ و الله ولدهآ مجتهد و طموح




2 .. الحرمه إلي تقول " متى ولدي يكبر ويعقل " هذي أبتعدي عنهآ ولآ تقربينهآ




وفي بعض الأمهآت تسوي حركآت بهآرآت لبنتهآ تبون تعرفون وش هي ..؟




1 .. بنتي تستحي خجوله وكلآمهآ قليل .. وتمدح بـ البنت
2 .. ذوقي هـ الحلآ و الله بنتي مزينه جآلسه بـ المطبخ من أول مآ جآت من المدرسه تكرف فيه .. وتلقين الحلآ من محل الحلويآت بس من كبر النصب صآر حلى بنتهآ




هنآ وخلآص ..!






وأخييرا..





بنجي للأشيآء الممنوعه منعاً بآتاً
سوي لهآ [ shift + delete ] فقط عند الضيوف ..:





خَليكْ عَ شَخصِيتِك , ..
يعنِي مَرّة جَرِيئَة .. دَآخلَة جَو مَعْ سُوالِيفْ الحَريمْ , خلهُم يسُولفُونْ أنتِي بَريئَة مَا تعرفِينْ وشْ يقُولُونْ ..
وإذَا نَآدِيتِي وحدَة كبيرَة مَرّة يعنِي فُوق 70 .. قُولِي لَهآ خَآلتِي ..
وفِي نَآسْ مَا تحبْ أحدْ يِنَادِيهَا خَالتِي أَو يكبِّرهَا فِي العُمرْ .. إذآ كنت عآرفه أسم ولدهآ نآديهآ بـ أم فلآن






الكلمآت هذي أحذفيهآ من قآموسك عند الضيوف والحريم الكبآر ..:





[ ok .. yes .. no .. سوري .. يب .. بليز ] < فآشله بـ الأنجلش
أقولكم نكته
في حرمه تحش ببنت قآلت هذي البنت لو أعطست قآلت " أوكي "
فعشآن محد يحش فينآ مثل هـ البنت ننسى هـ المصطلحآت





وفي كلمآت تتغير بقدرة قآدر منهآ ..:





يمه تتحول وتصير " أمي "





أختك قآلت لك جيبي لي مويه تقولين لهآ طسي مآ عندك رجلين هذي أنسيهآ
و تتحول لـ " آمري من عيوني "





مآ أبي تتحول لـ " تآمرين أمر "
قولي قسم تتحول وتصير " صحيح "
كذآبه / نصآبه تتحول وتصير " تمزحين أكيد "










وبس خلصنآ من التعليمآت





طبعاً المضوع مفتوح للأضآفآت يعني إلي عنده أضآفه لآ يستحي يضيف
وأتمنى يكون أستفآد الكل ومن اليوم ورآيح تسون هذي وتصيرون ذربآت