مصافحتي الأولى

ياهاجسي سلم القصيد بنظامه=وزنه وقافه والمعاني بتعبير
ماكل رجال انتسمع كلامه=ولاكل هرج نطبقه بالحذافير
كلٍ على جهده وقد التزامه=احدٍ يقدر واحد من دون تقدير
والمحترم يفرض علي احترامه=من لابتي والاعرفتة من الغيّر
لايامحمد تستحق الزعامه=ولولا الزعامه ماعرفنا المشاهير
ياللي بلغ في الشعر ذروة سنامه=والحق حق وللسوالف مصادير
حنا رجال ولانحب الرخامه=نضرب على الكايد وماقدر يصير
ماخاب ظن اللي يحطك حزامه=وأنته حزامي فالليالي المعاسير
مزبان من وقته على الضيق ضامه=ولاينخي فالضيق غير المناعير
انا احسب ان الوقت هون عرامه=واثره يابو مطلق يحوش الطوابير
رد البرى معلن وركز خيامه=واسبر خيوله مقبلاتٍ مغاوير
يالله عسى منه الفرج والسلامه=مرٍ مقابيلٍ ومرٍ مدابير
ان جيت افكر فيه ألاوش علامه=ينشد فكري ماله أية تفاسير
مدري حلاله وين وألا حرامه=متشابهٍ طبق الاصل بالتزاوير
من عقب ضحكاته وكثر ابتسامه=كشر بنابه ياحمر العين تكشير
عليه اثقل من رواسي تهامه=لو عند غيري ما عدل حبة شعير
شمس الضحى غطت عليها غمامه=والعج سبب في صفى الجو تعكير
من يشتكيه اكثر عليه الملامه=والحينه أشكي منه يالله عسى خير
يقطعك يانفسٍ بليا كرامه=ويقطعك ياراسٍ بليا صعاطير
حتى النعامه ويش ذل النعامه=قامت تعشى مع عكاف المناقير
ولاقام حظ الا الردي والهلامه=وابن الحموله حظه انتج بتقصير
وأسلم يابو مطلق وقافي ختامه=بالمسك والريحان وازهي النواوير

ياهجس بحر الشعر تسعين قامه=ولاحدٍ سبح غيرك بحورٍ غوازير
ياكاسبٍ سيف الهلالي سلامه=وشلفا ذياب وعنتر وسالم الزير
فيك المحيط الاطلسي وارتطامه=وصلف الرياح العاتيه والمعاصير
واهدى من اللي ماتحرك ثمامه=لاساقها الغربي معه حزة عصير
راعي المعاني فيك يلقا انسجامه=فرايد احلا من حليب المصاغير
من عقب هذا مرحبا والسلامه=يابن الرجال اهل السيوف البواتير
شعر الجزاله فوق صدرك وسامه=والحق ما يطلب ليا قيل تبرير
شرواك ياناصر رفيعٍ مقامه=قرمٍ ادلالك بالمكارم مباهير
ابشر ابعزك لابو اللي عظامه=لامن زهم تبرد ويلحقه تقصير
حنا نحب اهل الوفا والشهامه=والنا مع اهل الطيب درب ومشاوير
نصبر على صكات وقتٍ ،،أجسامه=اثقل علينا من(أبنات والنير)
الوقت ميله ليل حالك ظلامه=والنور وقفات الوجيه المسافير
والطيب ماكلٍ يجود اخطامه=كايد ولو ضير على النذل تضيير
صبر الفتى لامال وقته ادعامه=والصبر مفتاح الفرج والتياسير
وخير الليالي مستحيلٍ دوامه=مرٍ مجاهيمٍ ومرٍ مغاتير
حنا نعرف اهل الظفر والصرامه=ولا كل قوم يحتمون المظاهير
ناضع على الشي الحقيقي علامه=ونعرف خرافات القصص والاساطير
ماكل من يحلم يحقق حلامه=ولاكل رجالٍ يحسب المخاسير
طب الكسل والنوم موس الحجامه=والبطن تكشف علته بالمناظير
والطير لو تفعل فعوله حمامه!!=ماشفت للصقار تقدير للطير
والحظ له طيحه بعد واستقامه=والوقت له في كل الاجواد تأثير
وقبل تحيّة من يقدّم سلامه=للطيب اللي له معزه وتقدير