| |
23-11-2008, 12:55 AM
| ||||||||||||
| ||||||||||||
منقول:حب اول 
الله واكبر ذيك الايام من كان يتعرف على بنت كانت اول من المستحيلات كان اول اللي يتعرف على بنت انسان مو عادي انسان خارق للطبيعه انسان معجزه كانت البنت من رابع المستحيلات المقصود انك تتعرف على الملك اسهل من البنت وكان عندي ولد عمي كان اكبر منا ومطفوق ومرجوج لكن وجهه ( حلو)) احلي واحد في الحاره وفي خده حبه خال وعلى كتفه شامه وفوق عينه ثالوث وفي اصابعه دواحيس...بس الولد وسيم وفاكين معاه البنات بس بالخفيه.. ومره كنت نايم في السطح وجاني امر الله في الليل (بروح الحمام) واطل مع السطح والقى ولد عمي ابراهيم (( البرهي)) يمشي شوي شوي..(واثق الخطوة يمشي ملكاً) واشوفه جالس قدام دريشة جيراننا .. وشوي تطلع يد من الدريشة فيها عشر غوايش دقّة عبدالغني... واشوفها مادة له ورقه ..ما ادري وشي...الله من اللقافة فيني نزلت بسرعه بغيت اطيح من الدرج مرتين من الخفقة.. وافتح الباب الين خشته بوجهي...قلت وين جاين منه..؟؟ قال من البيت قلت طيب الدريشة اللي انفتحت..؟؟ سكر فمي وقال اسكت لحد يسمعنا... قلت وش اللي عطتك ( انا احسبها فلوس كان تقاسمناها) قال احلف ما تعلم احد... قال عطنتي صورتها قلت بذمتك كانت من المستحيلات اول... قلت ورني ها ولا باعلم...ويعرفني فضيحة...كني ام راشد (طراره) ولا بيت الا ادخله ... بس حلفني بامي وابوي والاشاره اللي في الرقبة (جغ جغ) اني ما اعلم ووراني الصورة لين ذيك البنت اللي ناقظة شعرها وحاطتن ميه وعشرين بكله ...غير التوك...وغير الشرايط.... ومصوره بدراعه مزلطه وزم... وطالع بعضن من محاسنها...(بيني وبينكم فكيت) قلت له ما عندها اخت..؟ او بنت عم ..؟ او بنت خال؟ (عديت العايلة صار كل عايلتهم ذكر الا هي انث) وصرت اذل ولد عمي كل ما بغيت شي هدتته ببنت الجيران... المهم طالت العلاقة وتتنظف ولد عمي وبانت عليه النظافه...واعرف انه بيقابلها من يوم يلبس ثوب اوب غزالين ابو كفته وشماغ العقل اللي لاعب فيه النشا كنه جالس تحت مظله والعقال كنه شايل استبنه وطاقية الزري ( اول ما شفته حسبته من عيال الملك سعود.) غير الكبكات السمكه والقيطان وغير اربع اقلام في جيبه (المشكله ما عرف يفك الخط ) غير المسواك جنب الاقلام ولو اني مفتشه لقيت محايات وبرايات وعلبة هندسة... من يوم اشوفه كذا عرفت ان وراه دعثه..وانا كاتم اسراره لانه يدهن سيري ( بالمعني الاصح يرشيني او يشتري ضميري بحفنه من الدراهم او قليلا من الباسكويت او نصف غرشة بيبس وانا ضميري رخيص اللي يدفع اكثر يشتريه ) المهم احسب ما يدري عن هالسر الا انا ... ما دريت نص العارض (الرياض) يدرون..كل من شاف واحد وراه الصوره وقال احلف ما تعلم احد.... لان اول من يحصل صوره خويته..؟؟ وبدا يرد فيني ولا عاد يعطيني الجزيه ... وبدا ينافخ علي ويتفل علي ويطقني وعرفت انهم نقلوا من بيتهم... هذا اللي خلاه يستقوي علي... ودارت الايام...واتعرف على وحدة لحمه ( وجه) حلوووووووه عليها فرقه(فارقينها بدريل ) بس الله يهديها قرويه تلبس منيخل وتحب تلبس الاحمر...وتلبس نعال شوكه...وعليها سلسال نسميه اول قلب..عليه سيفين ونخله كنها فنايل المنتخب... وعليها فلجه ابعد الضرس عن الضرس 2 سم كنها قرش...ولها سبع وسبعين ضرس غلي العشرة العقل ( يذكرني بواحد من الشباب مشرف في المساطيل)) بس كنا مقطوعين والله اي شي يعبرنا لو نشوف عنز ملبسينها... ويدري ولد عمي ويجلس يراقبني وكنت في غفلة من امري وعرف وين اوزي صورتها... كان بيتنا طين وفيه حفر تفرخ فيه العصافير قمت وسحبت واحد من الاعشاش ورميته...وخليته ا موزّى لي... المهم اكتشف المخبأ حقي...وجا في الليل وطلع الصوره وحطها في مخباته... وجيت الصبح انا وكشرتي...ابكحل عيوني بالصوره واحببها وادخل يدي في العش...ولا لقيت الصوره وادور في العش الثاني ولا لقيتها...والثال ث ومشيت على الاعشاش كلها...فقعت البيض وذبحت الحواقيل ولا لقيت الصوره... مؤامره توني نازل من السلم الا ولد عمي جاي...قال وش تدور يالنمس يالملكع ..؟؟ قلت ادور عصافير... قال عصافير ولا صوره جهيّر..؟؟ من الروعة طحت على طرف الاثله اللي عند الجدار وينشق برطمي...ولا همني الوجع همني ان ولد عمي مسك علي شي... واترجاه وابكي عنده واحبب يدينه ورجلينه لا تفضحني استر علي الله يستر عليك وراك ولايا... (متأثر بالافلام المصريه) قال لي والله اللي شفته منك ذيك الايام من الذل والاهانة لا اطلعه على عيونك....شغلني عنده عبد...جتى آخر شي صرت اهمزه...والبسه نعاله واصك ازرته واكد شعره..واطيبه ( صرت مرته) وداخل طالع يتفل علي وانا امسحها واقول امرك سيدي..ويمسك هالذله علي خمس سنوات...ياليت البنت تستاهل هالمذله... والله ان جدتي احلى منها بس على اصغر... حتى واحد من العيال اول مره اشوف واحد يحب قرش...واللي يقول صدق هذي ادميه..؟؟ واللي يقول وين تعرفت عليها في حديقة الحيوانات اللي في الملز..؟؟ كل من مريت ذب علي كلمه....حتى واحد من العيال اول مره اشوف رجال يحب رجال بس ناقصها سكسوكه... هذي قصتنا اول مع البنات... موهوب الحين البنت تلاحقكك وترقمك وتطلعك والهدايا تجيك وانت في البيت.. انا يوم جهير تهديني تعرفون وش اهدتني..؟؟؟ وكل يوم زاربتني فيها... معطيتني هدية سندوتش طحينية...!!!! هذي الهدايا الصح المهم بعدها قفلت القلب بالمفتاح ولا حبيت الا أمي   |
| مواقع النشر (المفضلة) |
|
|
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| منقول/كن راقياً باختيارك لاسمك | محمد | احتواء ما لا يحتوى | 6 | 24-11-2008 11:38 PM |
| المعجزة والكرامة والسحر (منقول) | فيصل الباز | روحانيات | 11 | 27-08-2008 04:39 PM |
| بعض من برامج رمضان ( منقول للفائدة ) | أحمد صالح | روحانيات | 14 | 13-09-2007 09:32 PM |
| مايكل اوين \\ منقول | زيزو | الرياضة والشباب | 2 | 16-05-2007 12:59 AM |
| المتشردون ( غير منقول بل هو راي شخصي) | henouda | حوار ومنطق | 2 | 27-04-2007 02:46 PM |
 |  |
العرض الشجري
