غيمة عطر ...... مصافحه اولى

قم يا قلم واكتب من أفـواه القصايـد مذهلـه =رتّب مساحات الظـلام وشـب ضـوّ القايلـه
قصة تراود خاطري وافكـار جـت متسلسلـه=من دون أعرج بالفكـر فـي نظـرة متمايلـه
( أخايل ) بروق العطر فـي يدّهـا متغلغلـه=واسمع رعدها فالحنايا ,كل عـرق ( أخايلـه )
واشوفها رشـت عطـر ( هتانـه ) متجولـه=فوق التراب المخملي , أرضه سماي المايلـه
واشوف سيل من المطر يشرب جسدها يـبلله=وشلون ذاق من الشهد علـى طريـق سايلـه
مدري مطر يـروي زهـر والا زهـر يكبلـه=كيف الزهر يغري مطر مـن نظـرة متفايلـه
واليا انتهت ابقى انا من مشكلـه فـي مشكلـه=اجمع حصاد ٍ طايله لـو قلـت مانـي طايلـه
يا عطرها لا تحسب الموعد بدونـك معضلـه=كانك مطر , في ارضها كل ( المروج ) الهايله
عطر ٍ سقاها غيمته وشلـون اكابـر واجهلـه=لا ضمهـا واشتمهـا يعمـل معـي عمايـلـه
ماقلتلك قم يـا قلـم واكتـب قصيـده مذهلـه=اكيـد لازم مذهلـه مدامهـا مـن ( عايلـه )