18-03-2011, 10:31 AM
|
| |
ابد لاتسالين
أبد لاتسألين بغربتي عن آخر الأخبار
عمت عين السفر دامي أذوق المر من كاسه!
أنا اللي بسألك قولي.. جواب بكلمتين صغار
بلد من دونك (اش) يسوى بعيني؟ يابعد ناسه
حقيقه ما أطيق البعد لو هو بيننا أمتار!!
ولكن هالفراق أقوى ولاينفع به سياسه
ترى لولا اتصالاتك.. برغم اللي يدق.. كثار
حشى مافيه أحد غيرك يرد لصدري أنفاسه
ألا ياشوق خفاقن ضويتي ظلمته أنوار
وصار اليوم ينبض لك مشاعر حيييل حساسه
تبي تدرين بفراقك معي يا الغاليه وش صار؟؟
تبي تعرفين مجنونك وش اللي قالبن راسه؟؟
لك الله عايش بحالي/ لحالي.. شاعرن منهار
وأنا كل ما طريتي لي صرخ شعري بقرطاسه!
يمر يومي.. ولابه غير همي والحزن زوار
عسى الله يرحمه حالن غدا هالثنين جلاسه
شحن جوالي أنهيته!! أقفّل .. وافتحه أمرار!!
قسم لولا رسايلنا .. حبيبك قاتله ياسه!
على برد السنه هذي ذكرت المدفأه والنار
وشال من الفرو كل ما لمس يد صاحبه باسه
فقدتك والدمع لامن ذكرتك يفضح الأسرار
ولا أشره على وقتن به الأيام دساسه
أسلي نفسي بكثر الأماني.. واليدين قصار
وأنام وربي العالم وش اللي خاطري حاسه!!!
كأني من ملك أسهم يبي تضحك له الأقدار
وقدّم كل ماعنده.. وفجأه أعلن إفلاسه!!
كأني طالب بغربه.. تذكّر عيلته والدار
وهو كل ماذكر أمه! ملا هالدمع كراسه
أعاني كثر ماتملك ومالك بالحشى تذكار
و(أحبك) والبلا حبك أبد ما أملك قياسه
جعل في داخلي عرقن سمع بك يا الغلا ماثار!
يموت.. و وش لي بعرقن فوصالك ميت إحساسه
حياتي تسأليني عن جديدي بالشعر وأحتار؟
وش أكتب لك شعر وانتي غديتي اليوم نبراسه!
ولكن أوعدك شعرن لاقوله يتعب الشعار
متى ماشفتك وموعد لقانا دقت أجراسه
لأن مافيني أتحمّل بعادك في سفر وانهار
عسى لايعيدها سفره.. ولو هي كانت دراسه!!!
....... |