مشتاق لك والغـلا قـرب يضيعنـي
والخـاطر اللي صِبر مل وقضى صبـره
بعلمك شـيٍ وإفهـم دام تسمعنـي
من واقع التجربه والوقـت والخبـره
( لو الخلايق على حبـك تنازعنـي ؟
يبطون ماحركوا فينـي مغـز إبـره )
ماغيرك أحـد ٍقـوى قلبـي وولعنـي
وغـلاك عندي بوسط القلب ياكبـره
جيتك مشتـت فكـر ودي تجمعنـي
متضايق من البعـاد وشوف لـي دِبْـره
لو بتكلـم غزيـر الشـوق قاطعنـي
مكسور والخاطر المكسور وش جبره ؟
يخونني الوقـت والغيبـه تصارعنـي
أكتب وحتى القلم خان ونشف حِبره !
رجعتلك (والغلا والشـوق) رجعنـي
ياحيّ هالشوف و الضحكه و هالنبـره
غيرك من الناس لو حـاول يطالعنـي
أصد عنـه ولا أشوفـه ولا أعتبـره
إلا أنت يالشـاري اللي منت بايعنـي
نظرة عيونك صفا لـو ليلتـي غبـره
وإن كان ودك لدرب الحب تدفعني ؟
القلـب يعشقـك مايحتـاج تختبـره
وأكبر دليل الخـلايق لـو تنازعنـي
بالحب ماحركـوا فينـي مغـز إبـرة