مجالس الرويضة لكل العرب - عرض مشاركة واحدة

#1 (**permalink**) 01-05-2010, 02:42 AM

علامك جيت ياقلبي وراجع خاطرَك مكسـور
أبد لاينكسر خاطرك دامـه صاحبـي جايـر

أبي تنسى مبادئنا وتتـرك طبعنـا المغـرور
وأبي هالحين ترجع له.. وقلّه يطلب ويامـر

وإذا جت عينك بعينه أبي تشهد شهادة زور
بأني مذنب ومخطي.. وقلبه ناسـي وغافـر

وقلّه لايخليني على حزنـي أبـات شهـور
لأن الموت أشوالي وأنا من طبعـي ماكابـر

ولايفكّر يقول: انسى وغيري بالبشر مذكور
لأني ماخبر غيره / قسـم بالله مـو خابـر

أحس اللي خلق زينه خلق باقي البشر ديكور
وأحس الورد لاشمه يميـل وينثنـي شاكـر

وربي هالبشر بعده هياكل والبيـوت قبـور
ولابه شي بالدنيـا يجـاري غيابـه الكافـر

حبيبي يابعد كل الحبايـب والزمـان يـدور
علامك ماتخاف الله تعال وشوفنـي وناظـر

ألا ياصاحبي القاسي بدونك هالحياة تغووور
ألا ياسبّـة جروحـي..ألا ياحظـي العاثـر

أحبك يامنى عمري وغيرك يمسك الطابـور
أحبـك يامولّعنـي وأذوب بصوتـك الخاثـر

أنا من كثر مااحبك أحس إني معك مسحـور
فديتك خلني مسحور إذا تبقى لـي الساحـر

تعااال وخذني بكيفك.. قصيد ولو تبي جمهور
فداك اللي قصدته أمس واللي بَقصِـده باكـر

لك الله وانت خابرني شجاع ولا علي قصور
ولكن لو وصل أمري بيدّك... آآه ياسااااتر !!

دخيلك انتبه! لا .. لا.. تمادى مع رجل مقهور
ترى قهر الرجال أكبر من اللي تحسب وفاكر

أنا حبي معك والله عفيف + وطاهر + ومستور
. حشا صعبه تلاقي قلب شروى قلبي الطاهر

إذا ناوي تجربني ترى وقتك معي مهدور
أموت بنار طغيانك.. ولاينقال لي صابر!

أمانه روح ياقلبي وأبي تضبط عليه الدور
أمانه طير له تكفى وأبي هـ الحين ياشاطر

أبيك تحب لي راسه وتنسى طبعنا المغرور
ترانا اثنيننا والله بدونه نكسر الخاطر