أظن تصفيق البنات بحراره

جرعة أمل ولا تموت المشاهير


تعبت من صوت الصخب والاثاره

وتعبت أخربها عشان الجماهير


الزهد بين الصومعه والمغاره

احساس خلاني مع نفسي صغير


التجربه ماتلغي الاستشاره

والظاهره من منتجات الاساطير


وانا ظهرت بعالم اكبر صغاره

الشاعر المادح .. والشاعر الزير


هذي محطاته وهذا مداره

وهذي خطاوينا .. وهذي المشاوير


مالله خلق كفوفنا للطراره

ولا خلق رجليننا للطوابير


حسب معاير الرقي والحضاره

ممكن تكون امير لو مانتب امير


الهم واحساس الفشل والمراره

خلاني اكتب شي عن ماكتب غير


الشعر لولا سطوتة واقتداره

انجلترا مافاخرت في شكسبير


ابلغ من الهمسه صريح العباره

واصدق من الدمعه صدوق المعاذير


الارض هذي ياقصور .. او جحاره

سكانها اثنين .. غير العصافير


ومادام حنا اثنين ماهي شطاره

الاولي يضحك ويهزا بالاخير


والله يالولا نفوسنا والنزاره

ان كان حشناها قصور ودنانير


الوجه له عند الكريم اعتباره

والقول له عند الرجال المحاذير


حنا بشر لكن بدون استماره

عقولنا تشكي جفاف التفاكير


سوالف اللا صدق والمستعاره

حسب قوانين السواليف تبذير



للعملاق / ياسر بن محمد التويجري