مجالس الرويضة لكل العرب - عرض مشاركة واحدة

#1 (**permalink**) 06-06-2009, 09:51 PM

كتبت الشعر مو لجلك ولكن فاض بي
.. بركـان اما انتي فلا تسوين قصيده في نظـر عينـي

حلفتي لي تصونيني إذا صار الزمـن خـوان ..
.. وأول ما عثر حظـي علـى دربـك خذلتينـي

كسر رمح الزمن صدري وجيتك أشتكي حيران ..
.. نزعتي الرمح من صدري وفي ظهري طعنتيني

خسااااره كييف حبيـت؟؟! نعـم .... ندمـان ..
.. غبي أدري نعم أدري ما دام انـك سكنتينـي

سنه من عمري وانـا فـي لعبتـك غرقـان ..
.. أشيل الشوك من دربك وجرحي كان يدمينـي

وكنت أبكي إذا تبكين وأكون لبسمتـك فرحـان ..
.. وكنت أقرب من رموشك لعينك يـوم تبغينـي

عرفتك للأسف صحرا وحولتك إلى بستـان ..
.. وشلتيني غصن أخضر وفي صخرك زرعتيني

حفرتك داخلي وظني تصوني عشرتي أزمـان ..
.. وكنت أحفر قبر موتي على ساحـل شرايينـي

على كف الشقا نامت جروحي والألم سهـران ..
.. يحطمني .. يبعثرني .. وفي صحراك يرمينـي

ولكن عزتي تفرض أكـون بدنيتـي سلطـان..
.. وإن ظنك أجي أركع لرجلك... مـا عرفتينـي

انا ما عادتي اشحذ من أمثالك رضا وإحسـان ..
.. أمـوت بعزتـي أرحـم ولا ذلـك يغطيـنـي

وما دام الوفا عندك يدور لـه علـى عنـوان ..
.. بدور لي على قلب يصـون الحـب وسنينـي

ولو قلبي رجع حَبـك بولـّع فيـه بالنيـران ..
.. وبكسرّهـا أنـا رجلـي إذا صوبـك تودينـي

ولو دار الزمن ضدك وجيتي تطلبي الغفـران ..
.. وجبتي الشمس في كفك لـعندي..ما بتلقينـي

تقول الناس في وصفك:جميله مثل عود البـان ..
.. وإنك أجمل وأحلى بشر مخلـوق مـن طينـي

وإنك غالية وأثمن مـن الياقـوت والمرجـان..
.. تقوم أكوان من أجلـك وتقعـد لـك بلادينـي

حساااااافه غرهم شكلك ويا ما تخدع الألـوان ..
.. عموماً .. بقت كلمة أخيـرة لـك واسمعينـي

إذا كنتي بنظر غيري ملاك على هيئة إنسـان ..
.. قسم بالله ما تسوي شعره من رمـش عينـي