ياهاجسي مع نـور شعـات الاشفـاق=ابـدع جزيلـك دامـه الذيـب عـاوي
اغطس بحور الشعر غبـات الاعمـاق=فكـري لجـزلات القصايـد قـنـاوي
ياملهمة شعري علـى بيـض الاوراق=راسي في بدع ابيـات حبـك رهـاوي
ياملهمه مـن عقبكـم خاطـري ضـاق=اصبـر وامشـي ساعتـي بالمنـاااوي
ياصاحبـي ياسيـد ترفـات الاعنـاق=ياللي من اضلالـك جزوعـن حيـاوي
اخـذ الخبـر والوضـع معـاد ينطـاق=عقبك علي ضاقـت جميـع النحـاوي
البعد نـارن فالصـدر تحـرق احـراق=وجمعاك برقه فـي ضلوعـي سنـاوي
يامل قلبـن مـن عنـا الوقـت نتـاق=نتـق القطـا لاحـام جـوه نــداوي
امسي وانـا مشتـاق واقـوم مشتـاق=شوق الـذي عـن دار خلـه جـلاوي
الليـا تذكرهـا سـرى الدمـع دفـاق=ويصيـح لا كثـرت عليـه الـبـلاوي
ودي بعيني تحضـن عيونـك اعنـاق=بارضن خلا وانته كما البـدر ضـاوي
ماتدري انه داخلـي مصنـع اشـواق؟=ودي اوقفـهـا ولانـيـب قـــاوي
اعيـش لـك مغـرم وهايـم وعشـاق=واروح لك في حب شخصـك افـداوي
قصر المحبـه مايجـي ساسـه ادقـاق=وجسر المواصل مـا انبنـا بالرجـاوي
ان كان درب الوصل عسرن على الساق=بمشيـه لـو عيـت عليـه الخطـاوي
دامي جبرت السـاق فالـدرب تنسـاق=سوق الشجاع اللـي تسوقـه عـزاوي
ياهاجسـي ابـدع جزيـلات وارقـاق=تلهّمـك مـن قلبـي عليهـا شفـاوي

لشاعرها ::: حقان العجمي


تحياتي للجميع !!