مجالس الرويضة لكل العرب - عرض مشاركة واحدة - ( قــصــه تقــطع الــقــلب ) قصـه فــارس!! :(

#1 (**permalink**) 19-02-2008, 01:10 AM

السلام عليكم ورحمة الله وبركاته

هذي قصه قراته في حدا هالمواقع القريبه <<الجيران

والي كاتب الموضوع يقول ان هذي قصه صديقي فارس

وخوينا الي كاتبآ الموضوع طلب من فارس انه يكتبه له بملف وورد

وكتبه فارس ..

القصه مؤؤؤثره لابعد الحدود (( واذا قريت اوله تبي تكمله كله من الحماس ))
بس اسمعو القصه موؤثره جدا جدا وتبون الصراحه تاثرت يوم قراتها وحبيت انقلها لكم،،،،

بسم الله نبدا ،،،،،

انا مب مثقف مثلكم وماراح اكتب القصة بالفصحى لا ...
بدايتي

انا عشت طفولتي مثل اي طفل ... براءة ... وحب .... والاهم .. في ظل حنان الوالدين

كنا نعيش بالدمام انا (( فارس )) كنت بصف سادس واختي الكبيرة وكانت ايامها مخلصة الثانوية ومخطوبة واختي اللي اصغر مني بسنتين واخواني التوأم ياسر وشهد ...

كان اكبر همي اللعب ودايما في الشارع العب مع ذاك واضرب هذا ويضربني ذاك

تعبت من اللعب وصار لازم ادخل البيت لكن استغربت لقيت اخواتي يبكن وخاصة اختي الكبيرة تبكي بكى مو طبيعي تبكي بقوة بصوت مسموع سألتها وليتها ماعلمتني

امي وابوي راحوا بحادث سيارة ... وكملت بكاها

امتلى بيتنا بالجيران وخاصة الحريم

جانا عمي يبي ياخذنا معه للقصيم بعد مايكمل زواج اختي ... اختي كانت رافضه لكن عمي كان شديد عليها وتزوجت غصبا عنها مع انها رافضه وقت الزواج

بقي انا واختي الي اصغر مني وياسر وشهد

ورحنا للقصيم ببيت عمي ... عمي باختصار كان لا مبالي بنا متنا او عشنا ما هو مهم عنده وزوجته كانت متسلطة

تسب وتضرب وتشتم .. واكثر الاحيان انام انا واخواني جوعانين
دخلت المتوسطة وخلصتها بظروف كله ضرب وشتم وطرد ... ايه تميزت عن اخواني صار عمي

يطردني وارجع بنفس اليوم لسببين الاول مادري وين اروح ووين انام

والسبب الثاني اخواني انا اكبرهم ولازم ماخليهم خاصة اختي اللي بعدي ..

يكفيها ماجاها هي اكثر واحد منا عانى من بيت عمي دايما يشغلونها في البيت تطبخ وتغسل وتكنس

ومرة عمي ماتخلي لها مجال للدراسة مع ان لها بنات ... مسكينة دايما ترسب في الدراسة وماتنجح

الا في الدور الثاني و دايما تنام وهي جالسة كله من التعب من شغل البيت

واذا طردني عمي اغصب نفسي على الرجعة بس عشان اختي ... ارجع للبيت احسن واخليهم ينشغلون عنها فيني

يعذبوني انا احسن من يعذبونها هي

ايام ماكنت في المتوسطة زارتنا اختي الكبيرة مع زوجها اول زيارة لها بعد زواجها وعمي ماكان

موجود وطردتها مرة عمي بكل وقاحة

بعدها صارت اختي وزوجها الطيب اذا بغوا يزوروننا يوقفون عند الشارع ويطق الجرس زوجها

طبعا مافيه ببيت عمي يفتح الباب الا انا لأن عمي اكبر عياله بنات والبقية صغار

يطق الجرس زوجها واطلع له انا وبصعوبة اطلع اخواتي من البيت عشان يسلمون على اختهم

دخلت الثانوية كاره عمري بديت احس بالنقص بديت اسأل ابوي ماخلى لنا شي؟؟ .. ابوي ماله بيت ملك ؟؟ اجل وينه.. ماله راتب؟؟ اجل من ياخذه .. بديت اتسأل بس صعب اسأل عمي بيجلدني ان سألته

صرت احس نفسي ناقص احس نفسي محروم ... مقهور

اصحابي بالثانوي اشوف كل واحد منهم يتفنن بجوالاتهم وكلهم لهم سيارات الا انا ... ليش

انا مالي شي لا جوال ولا سيارة ... ولا أب

كانت مدرستي بعيدة شوي عن بيتنا اقصد بيت عمي تقريبا ساعة كاملة مشي

دايما انحرج من صديقي وولد جارنا فيصل هو طيب ومايقصر معي لكن انحرج منه دايما لاصق فيه

عشان الروحة والطلعة من المدرسة

طلبت مرة من عمي جوال بعد مابدوا يعايروني زملاء المدرسة

طلبت من عمي يشتري لي الجهاز لكن عمي لوى يدي بعد ماشيشته مرة عمي .. مدري ليه التعذيب

يقول لا وخلاص يعني لازم الضرب

والحين ماقدر اطلب منه سيارة مرة وحدة ... بيذبحني وماتجرأت اطلب الصراحة ... خفت

خلصت اولى ثانوي محروم وناقص ومقهور .. وووووو ... مشتاق لامي وابوي مشتاق لهم بقوة من

زمان ماشفتهم من يوم ماكنت بسادس

عطلوا الطلاب اختي كالعادة لها دور ثاني والبقية نجح حتى بنات عمي .. بنات عمي اكبرهم اكبر مني
بسنة

التسأولات مازالت تلح براسي ابوي ماخلى لنا شي ؟؟ طلبت المساعدة من صديقي فيصل

طلبت منه يسأل ابوه بشكل غير مباشر ... الموظف الحكومي يصرف لأبنائه راتب او ينقطع

وكان الجواب ايه يصرف لهم

هنا طفح الكيل وانقهرت وذات اليوم مارجعت للبيت بسرعة افور واغلي من القهر

لكن وين اروح لازم ارجع والا وين انام

وقررت اسأل عمي راتب ابوي وينه ؟؟ مع اني خايف منه

رجعت الساعة 2 في الليل والحمد الله كان الكل نايم ... ونمت وانا منقهر
في اليوم الثاني سألت عمي وحنا لحالنا

قلت :: عمي وين راتب ابوي ؟؟

عمي :: ............... ............. (( سكتت ومارد علي ))

سألته مرة ثانية

قلت :: عمي وين راتب ابوي ؟؟

مادريت الا بكف ضاربني فيه

وقال :: ياقليل الخاتمة عايشين ببيتي وتبي فلوس

لكني ماسكتت له جادلته

انا :: ابي راتب ابوي انا محتاج واخواني محتاجين ونبي الراتب

بعد شوي

جت النسرة مرة عمي على اصواتنا

وبعد ماعلمها عمي بسبب هواشنا قالت له ببساطة

مرة عمي :: اطرده وفكنا منه

وماصدقت خبر جابت له مرة عمي الخيزرانه عشان يضربني لكن فريت بجلدي وطلعت من البيت مقهور

خلاص ماله داعي ارجع البيت اختي ومعطله ليه ارجع اجل

بس صح لها دور ثاني ماراح يخلون لها مجال تذاكر

ياربي شسوي

رحت لبيت صديقي فيصل

فيصل دلوع اهله و له اخوان كبار وعايش حياته ماشاء الله عليه

طلبت منه اننا نتمشى شوي

وعرفني على اصدقاء له .. لهم استراحة يجتمعون فيها

وبقيت معهم اليوم باكمله ومارجعت البيت

اصدقاء فيصل عرفوا ضروفي واني مطرود وسمحوا لي اني ابات في الاستراحة

واخذت ثلاث ايام وانا في الاستراحة

وانحرفت وترك الصلاة وتعلمت التدخين لكن ماجاز لي الصراحة وهم ماغصبوني عليه

وتعلمت اغازل كنا في ثلاث ايام نروح للسوق وللمجمعات عشان نغازل هناك

لكن انا ماغازلت ابد لأنه ببساطة ماعندي جوال وماعندي سيارة عشان اخذها معي

ففترة مغازل الشباب في المجمعات كنت اخذها فرصة واعتزل بمكان لحالي كنت احب الوحدة

ماحب احد يقعد معي

كنت افكر بحالي ياربي مادري عن اخواني شي ووش صار عليهم ثلاث ايام ماشفتهم

لازم ارجع

بعد مارجعوا الشباب وكل واحد يسولف عن صيدته

طلبت من فيصل يرجعني البيت وماعارض على طول رجعني

لكن لما وصلت البيت كانت الساعة 2 في الليل خفت يكون احد بعده صاحي فانتظرت في الشارع لين جت الساعة 3

تسللت للبيت ودخلته واشوى غارق في الظلام تسللت لغرفة اختي وانا ادري انه ينامون معها بنات عمي لكن مااهتميت ابي اشوف اختي واتطمن ماعلي من احد

فتحت الباب لكن عجزت لعرف ايهم سرير اختي اخاف اكشف اللحاف وتطلع وحدة من بنات عمي وابتلش

وتخليت عن المحاولة .. اشوفها ان شاء الله بكرة

ورحت لفراشي ونمت لامن شاف ولامن دري

في اليوم اللي بعده لما شافني عمي ماقالي شي اقصد ماحاول يطردني مرة ثانية كان يهاوش وبس رغم تشيش مرته علي

تطمنت على اخواني وخاصة اختي كاسرة خاطري تغيرت في ثلاث ايام صارت كأنها عود وشكلها مبهذل مالها فرصة تهتم بنفسها شايلة البيت كله فوق راسها ولازم تهتم باخوانها الصغار ياسر وشهد

جوني ياسر وشهد فرحانين انهم السنة الجاية بيدخلون المدرسة

عرفت بعدها ان اختي لحت على عمي انه يسجلهم بالمدرسة عمي سجل ياسر واختي سجلت شهد

وانا وقتها كنت مطرود ... آآآه يالقهر

نجحت اختي في الدور الثاني

وبدت الدراسة

صرت انا الحين بثاني ثانوي واختي بثالث متوسط وياسر وشهد باولى ابتدائي

قبل بداية الدراسة باسبوع زارتنا اختي وكعادتها حطت بيدي فلوس علشان اذا احتجتها انا واخواني ...

لكن مرة عمي دايما تدخل غرفنا وتفتش فيها خاصة غرفتي

انا محتاج للفلوس لكن وين ادسها...

المهم راحت اختي الكبيرة هي وولدها وبنتها وزوجها بعد ماعطتني رقمها ورقم زوجها طبعا انا مالي جوال كتبت رقمها بورقة وحاولت ادس الفلوس بمكان ماتوصله القشرا اما الورقة اللي فيها الارقام لصقتها تحت سريري

مرت الايام وزاد الشغل على اختي شغل البيت ودراستها وتذاكر لاخواني ياسر وشهد ويالله يالله تتفرغ لنفسها

اذا شفتها تروح تذاكر او ترتاح وشفت بنات عمي وامهن يحاولن يتحرشن فيها بالكلام رديت عليهم بس علشان اشغلهم عن اختي هم مايرتاحون لين يسوون مشكلة

ومع مرو الايام .. وفي الاختبارات الشهرية

كنت جالس اذاكر لاختي المسكينة مادة صعبة عليها

مرة عمي دايما ماتخليني اجلس عندهم تقول علشان تاخذ حريتها وهي وبناتها عشان يكشفن بالبيت

انا هذاك اليوم عاندت ومارحت للمجلس تبغى تكشف تروح تكشف بوحدة من الغرف ماكثر الله الا من غرف البيت

وقعدت اذاكر لاختي ... فجأة دخل علينا عمي معصب سألته وحدة من بناته :: وشفيك يبه ؟؟

عمي :: كفرات سيارتي مفششه هالبزران مايفششون الا سيارتي لو اعرف من ولده بس

سكتنا شوي انا ماهتميت لو يفششون راسه بعد احسن

بعد شوي قالت مرة عمي لعمي

مرة عمي :: انا شفت هذا يدور حوالين السياره ... (( واشرت يمي ))

خافت اختي وهي تعرف عمي اذا عصب عصب

وقالت :: لا ياعمة فارس طوال اليوم وهو معانا ماطلع للسيارة ابد

مرة عمي :: الا انا شفته يدور حواليها اكيد هو اللي فشش الكفرات

عمي :: فااااااارس ليش فششتهن يالكلب

قلت انا لمرة عمي :: احلفي انك شفتيني

لكن عاد عمي مايكذب حرمته

توجه يمي انا من الخوف قمت مستعد للضرب

تقرب مني ودزني وطحت على الارض ... اختي حاولت تدافع عني مسكت يد عمي تحاول تهديه لكن دزها هي الثانية وطاحت علي

المسكينة قامت عني بسرعة على بالها انها ثقيلة علي

وقالت :: فارس عورتك

انا :: عمي مب انا صدقني ماقربت سيارتك اصلا

شفت مرة عمي تحط بيده خيزرانه يعني عليك فيه .. تقهرني تصرفاتها بناتها اعقل منها

تقرب عمي مني وهو فاير دمه ومسك شعري

عمي :: شف ياقليل الخاتمة تصلح الكفرات وانت ماتشوف الدرب فاااااهم

قلت لعمي وانا معصب ورفعت صوتي عليه

انا :: عطني راتب ابوي واصلحها

مادريت الا وعمي رفع رجله وداس بطني بقوة وبعدها ركلني

انا قعدت اتلوى من بطني

قالت اختي :: اخص الله ياخذك انت مانت عم

وسمعته يمحطها بالخيزرانة

عمي :: قم اشوف قم خذ السيارة ورح للمحطة يسوون الكفرات قم وخلهم يغيرون الكفرات بكفرات جديدة فااااهم

حذف علي المفاتيح والفلوس وطلع عمي من الصالة

يالله يالله قمت

سمعت مرة عمي تقول لي

مرة عمي :: علشان مرة ثانية ماتعاندني

طلعت من البيت و اخذت السيارة ... اشوى ان المحطة قريبة .. السيارة بنفسها يالله يالله وصلتها هي وكفراتها

وانا يالله يالله اسوق ... بطني يعورني

رجعت البيت وشفت لمبات غرفتي والعة عرفت انها النسرة اكيد كعادتها تفتش ... اووووووووه الفلوس اكيد اكيد بتشوف فلوس اختي الكبيرة اللي عطتنياهم وبتاخذهم

تعمدت افتح الباب بسرعة علشان ادخل عليها قبل ماتتغطى علشان تتأدب مرة ثانية

لكن اللي كان بالغرفة اختي ماهو مرة عمي جالسة على سريري وشكلها تحتريني

ماقلت شي ولا سلمت عليها حتى

اختي :: شلونه بطنك الحين ؟؟

ان تكلمت ببكي وانا مابغى ابكي قدامها

مارديت عليها نزلت ثوبي مستعد للنوم وعلشان تطلع هي بعد

اختي :: عجزت لا انسى شكله وهو يتوطاك الكلب

شكلي كاسر خاطرها مثل ماهي كاسره خاطري

طلعت من الغرفة بروح للحمام مااقدر اتكلم معها ببكي على طول

رجعت للغرفة والحمد الله ماكانت موجودة فيها ... حاوت انام لكن عجزت انام من بطني احس اني ابرجع ... مادري وش فيني

بعد يومين وانا بالمدرسة كنت اكثر الاحيان اجلس بلحالي مع ان فيصل دايما يطلب مني اتمشى معه لكن انا ماابي اجلس مع احد

وانا جالس جاني سعود زميلي بالمدرسة ومن جيراننا لكن شري وكلامه وصخ وفيه نذاله ومايخلي احد بحاله

جا وقال :: اقول فارس لقيت شي حلو مرة ياليتك تقراه .... (( ومد علي ورقة ))

اخذتها وراح عني واللي يشوفه يقول كأنه منتصر ... يمكن فاتح القدس وانا مادري

المهم فتحت الورقة وكان فيها

تدري وش اللي يجرح القلب جرحين
ويمد حبـل الحـزن فيـك ويشـده
::
انك تناظر طفل مـن غيـر ابويـن
يمشي ودمعـه سايـل فـوق خـده
::
منظر صعيب ويقسم القلـب قسميـن
لا قـام يمسـح دمعـه بكـف يـده
::
يمش ولا يدري طريقة علـى ويـن
لين التعب من كثـر مـا تـاه هـده
::
اثقل حـروف يشيلهـا فيـة حرفيـن
لا أب يـدريـبـه ولا أم تـــرده
::
في خطوته رحلـة ودمعـة وسكيـن
وحـظ توسـد بالمراسـي مـخـده
::
جيت اسألـه بالله قللـي ولـد ميـن
وبغي يجاوب وختنـق صـوت رده
::
أنـا يتيـم ومـا لدربـي عنـاويـن
وجزر الحزن فينـي يسـاوي لمـده
::
وطعم الطفولة ما عرفته لهـا لحيـن
وثوب السعادة صـرت مانيـب قـده
::
ابكي إلى من شفت غيـري سعيديـن
ليـن البكـا فينـي يوصـل لحـده
::
واقفي ورحت امسح دموعي من العين
وعيني تناظـر دمعتـه فـوق خـده
::
وهذا اللي يجـرح القلـب جرحيـن
ويمد حبل الحـزن غصـب ويشـده

طلعت دموعي غصب عني مسحتها مابغى احد يشوفني .. تلثمت وصرت اقلب في الورقة مابغى اقرا القصيدة مرة ثانية بس بحتفظ فيها

بالطلعة تهربت من فيصل لأني مابي ارجع البيت بسرعة

بالطريق للبيت مشي .. طلعت الورقة اللي فيها القصيدة وقعدت اقراها مرة ثانية

ليش انا يتيم ليش مامت معاهم ليش كل الناس لهم ام و اب الا انا

ابي كل الناس يموتون خاصة عمي ابيهم يموتون كلهم ابي اذبح كل الناس اكرههم كلهم

ليش انا ناقص ليش انا محروم .. يمة يبه تعالوا شوفوا .. تعالوا شوفوا عمي وش يسوي فيني

اخذت اهذي بالكلام واحس الدنيا ضايقة علي ... احس اني مخنوووووق

وصلت حارتنا الساعة 3 الظهر باقي مااذن العصر

لكن تفاجأت ... لقيت شهد وماسك يدها واحد ويمشي معها

ركضت لين وصلتهم لقيت اللي مع شهد سعود

يوم شافني

سعود :: عرفت انها اختك مسكينه تشبهك

مارديت عليه والتفت لشهد شكلها كانت تبكي وتوها ساكته ولاحظت ان خدها احمر اكيد القشرا مرة عمي من غيرها

قال سعود

سعود :: لقيتها ضايعة وتبكي وبغيت اوصلها لبيتكم

بيتنا كان اخر الحارة مسكت شهد ومشيت فيها رايح للبيت

سعود :: اشوف معاك دروسك توك تجي من المدرسة ؟؟

بعد مارديت عليه

سعود :: وش رايك بالقصيدة ؟؟ حلوة صح ؟؟

فارس :: ............... ............... ......

سعود :: ياخي كأنه يتكلم عنك

فارس ::............. ............... ............

سعود :: ياخي ماشاء الله عليك رغم ظروفك الا انك دايما تنجح تصدق انه انا المفروض بثاني جامعة بس اسقط

فارس :: حاسدني .. تبي تاخذ مكاني خذه مابيه

سعود :: لا اعوذ بالله

فارس :: ............... ............... ...........

سعود:: وشفيك كل شوي تمسك بطنك

فارس :: مافيني شي

فجأة تدخلت شهد :: عمي قبل يوميــ

وجريت شعرها علشان تسكت

سعود :: رح للحمام طيب لا تسويها علينا

ضحكت شهد اظنها تتخيل

بعد شوي قال سعود

سعود :: فارس انت لك خوال ؟؟

فارس :: ايه

سعود :: طيب ليه ماتروح لهم مدام انك مانت مرتاح هنا ؟؟ هم وين ساكنين

فارس :: بالرياض ... وعمي مانع خوالي انهم ياخذوننا اصلا انا ماعرفهم زين ماعرف الا اسمائهم

سعود :: طيب رح لهم خلاص انت الحين رجال

فارس :: مامعي سيارة

سعود :: بسيطة .. اسرق سيارة عمك

سعود لو يدري اني ماطلعت بطاقة احوال الى الحين بيضحك علي وبيعلم الشباب و بيتطنزون علي اكثر .. انا اسمي الى الحين بكرت العايلة وعمي ماهو مهتم فيني عشان يطلع لي بطاقة احوال

قلت مرة ثانية

فارس :: مامعي سيارة

سعود :: ايه فهمنا .. اقول اسرق سيارة عمك

فارس :: انت خبل تبغى الشرطة تمسكني

سعود :: اختك الكبيرة تلبس عباة صح ؟؟

فارس :: شكلك ناوي على حرش ياسعود شف تراني متعود على الطق تبغى تتظارب .. يله .. ماعندي مانع

سعود :: بسم الله وش قلت انا الحين

فارس :: وش تبي في اختي تسأل عنها

سعود :: علشان اعلمك وشلون تروح للرياض بسيارة مسروقة ... والا ماتبي تروح لهم ؟؟

فارس :: الا

سعود :: اختك تلبس عباة صح ؟؟

يقصد عباة على الراس

فارس :: اختي بثالث متوسط وماتطلع الا للمدرسة وطبيعي تلبس عباة على الراس

سعود :: اجل حلو ... خذ اخوانك .. والتفتيش اذا شافوا معك حرمة عليها عباة يأشرون لك يعني خلاص امش بدون مايفتشون .. انا عدة مرات صارت معي كذا اروح للرياض اذا صرت لحالي يطلبون رخصتي واذا صارت امي او وحدة من اخواتي اللي يتغطن معي مايفتشون .. ويأشرون لي يعني خلاص رح

فارس :: بس انا اذا سمعت كلامك عمي بيبلغ علي قبل اوصل الرياض واصلا مادري وين ساكنين خوالي بالضبط

سعود :: كيفك انا علمتك وانت كيفك .. مع السلامة

وراح سعود لبيته قلت لشهد

انا :: وانتي مايوصلك الا ذا

شهد :: كنت ادورك

فارس :: ليش تدوريني ضايع انا

شهد :: عمتي ضربتني

فارس :: وش قلت انا لاتقول لها عمتي فااااهمة

شهد :: زين

عطيتيها كتبي وشلتها

انا :: شهد هذا لا تروحين معه مرة ثانية هذا وصخ .. سوا فيك شي ؟؟

شهد :: ايه

انا هنا فرت وبغيت الحق سعود واذبحه .. الكلب النذل والله لاوريه الحقير...

انا :: وش سوالك قولي ؟؟

شهد :: وداني للبقالة وشرالي هذا

وورتني كوكاو كتكات

استغفر الله شكيت في الرجال

انا :: طيب وصلنا البيت كوليه قبل ندخل البيت اذا دخلناه ماكملتيه

ونزلتها وخذت كتبي عنها .. طولت وهي الى الحين باصبع واحد جلست على عتبة البيت احتريها وسمعت يأذن لصلاة العصر

انا :: شهد يلة سنة تاكلين

شهد :: مابيه يخلص حلو طعمه

مسكينة شهد .. وياسر بعد .. ماتهنوا بطفولتهم انا يوم اني بابتدائي كنت عايش طفولتي وكنت اللي ابيه اخذه ... العاب وحلويات وكل شي حلو

قلت لشهد عشان تخلصني .. تعبان وجوعان ماتغديت ولا افطرت حتى ... قلت لها

انا :: طيب يله بسرعة ياشهد عمي الحين بيطلع

فعلا خافت وبدت تاكل بسرعة مع ان عمي مايضربها لكن يكفي تتعقد لأنها دايما تشوف اخوانها الكبار ينضربون على يد هالعم

ياسر هو الوحيد اللي عايش حياته احسن منا

يذكرني بتصرفاتي يوم كنت بابتدائي

ياسر كل وقته بالشارع واكثر الاحيان القاه ببيت فيصل يلعب مع اخوان فيصل اللي كبر ياسر

طلع عمي عشان يروح يصلي ماكلمني ولا كلمته ولا سلمت عليه
مر علي يومين وانا باستراحة الشباب كلهم يقطون الا انا .. سامحيلي الشباب اقعد معاهم بدون ماادفع شي

عرفت ان الشباب بعضهم طلاب جامعة وبعضهم طلاب ثانوية

كنت جالس معهم لكن ساكت .. هالشباب مايملون كله لعب وضحك وتعليقات وسوالف ماتخلص

ازعاج وانا احس حرارتي هاليومين مرتفعة ...

اسمع تعليقاتهم ... وانا اتأمل فيهم .. غريب امرهم .. ليش يجون الاستراحة مع ان لهم ام واب

انا لي يومين ماطلع واجد من الاستراحة ... سيارة فيصل ماكان معي شي علشان اعبيها بنزين .. لكن حمدت ربي ان سيارته جديدة وكشخة وبعض شباب الاستراحة اذا حبوا يروحون للسوق او أي مكان يطلبون مني بعض الاحيان سيارة فيصل .. وانا اسلمها لهم مو لسواد عيونهم ... اسلمها اذا شرطت عليهم انهم يعبونها .. والحمد الله

اما المدرسة صرت ماروح لها مدام ان اختي سقطت ليش اتعب نفسي واروح انا كنت مخطط اننا نروح للرياض بعد ماننجح عشان نكمل النصف الثاني هناك مع ان مالي لا بطاقة احوال ولاشي لكن بنفذ كلام سعود .. وان شاء الله نوصل الرياض بسلام

كان واحد من الشباب يجي من عنيزة يوميا ويعقد شوي عندنا ويروح

بعد مرور اليوم الثالث علي وانا بعيد عن اخواني

كنت جالس مع الشباب غناء وطبل ودخان .. فجروا راسي بهالاغاني وانا حرارتي مرتفعة احس بتعب

في الليل جا هذا ولد عنيزة وقعد يقول لنا موقف مع امه صار لهم وهم جايين من عنيزة

امه على حد كلامه كانت تبي تزور وحدة ببريدة.. لكن صار عليهم حادث بسيط وطلعوا سالمين منها وهو الحين قاعد يقص على الشباب الموقف

تذكرت امي ... آآآآآه يايمة

طلعت من الغرفة اللي فيها الشباب مابي اسمع شي ... امه سلمت اما امي انا لا ...

وقعدت بلحالي بحديقة الاستراحة

بعد شوي جاني ولد عنيزة .. ماعرف اسمه

ولد عنيزة :: هلووووووووووو ابو الشباب هههه

انا :: ............... ........

ولد عنيزة :: لي فترة اشوف سيارة فيصل معك وهو مااشوفه ... وينه

انا :: ............... ............

ولد عنيزة :: صايرن مااشوفه فيصل .. مريت بيته قبل اجي ولا لقيته

انا :: ............... ....

ولد عنيزة :: ماتلاحظ اني اكلملي جدار ؟؟

انا :: الحمد الله على سلامة امك

ولد عنيزة :: الله يسلمك .. تصدق شكيت انك اطرم

انا :: تعرف فيصل انت ؟؟

ولد عنيزة :: ايه فيصل ولد خالتي

انا :: ماعمري شفتك بالحارة

ولد عنيزة :: ماحب حارتكم ... انت فارس .. صح ؟؟

انا :: ايه .. وش اسمك انت ؟؟

ولد عنيزة :: خالد تقدر تدلعني خلودي هههههه

انا :: ماتضحك

و قمت عنه احس اني تعبان وابي انام

لأننا بوقت امتحانات الشباب مايسهرون واجد والاستراحة تصير فاضية من الفجر الى العصر

انا صرت ماقدر اقوم من فراشي حرارتي مرتفعة

في الليل الشباب ماقصروا اللي يجيبلي بندول واللي يحاول يخليني اكل واللي يلحفني بعضهم يلحفني بفروته .. حتى الاغاني صاروا مايسمعونها الا في غرفة ثانية علشان مايزعجوني .. اما خالد يغصبني اروح للاسعاف علشان اخذ مغذي او أي شي

تحسنت صحتي لكن مر علي اسبوع وانا بالاستراحة والتفكير باخواني ذبحني .. مدري عنهم شي .. اكيد جواعنين وبردانين .. واختي اكيد جوعانه وبردانه وتعبانة من شغل البيت .. ليت الاستراحة هذي لي علشان اجيبهم نعيش هنا بسلام

واخذت طوال الليل وانا افكر فيهم وقررت اروح لهم الصبح اذا ذلف عمي لشغله

احتريت لين جت الساعة عشرة الصباح

ورحت للحارة بس ماشفت ياسر .. كان على بالي اني ابشوفه يلعب بالشارع كالعادة

جيت ابدخل البيت لكن لقيته مقفل وانا مامعاي مفتاح .. ورجعت للاستراحة ناوي ارجع المغرب .. انا لازم اشوف اخواني اليوم .. لازم

الاستراحة فاضية .. اليوم السبت اخر اسبوع من امتحانات الثانوية ..

عجزت لارتاح ابي اشوف اخواني .. اسبوع .. اسبوع ماشفتهم .. وهم محتاجين لي

احترت مدري وين اروح .. والمغرب عيا لايجي

حسيت الدنيا صغيرة علي من الهم .. لا بيت ولا فلوس ولا شي واخواني كاسرين ظهري خاصة اختي .. ياسر اكيد يروح لبيت ابو فيصل او يلعب بالشارع طوال اليوم وشهد تدافع عنها اختي لكن اختي من لها سند غيري وسندها متشرد

الحمد الله اخيرا اذن المغرب .. طيران لبيت عمي ابنتظر عمي لين يطلع يصلي وبعدين ادخل البيت

وصلت الحارة واحتريت شوي لكن عمي ماطلع .. قوموا للصلاة وعمي الى الحين ماطلع

لقيت باب البيت مقفل

ماقدامي حل الا اني اتسلق الجدار .. والناس بالمسجد الحين .. ركبت على سيارة فيصل وبعدها تسلقت الجدار وطبحت كأني حرامي

بررررد

لكن تفاجأت .. لقيت اخواني ياسر وشهد يبكون بالحوش ويتنافضون من البرد

هم خافوا مني على بالهم اني حرامي لكن بعد ماميّزوا اني اخوهم جولي ركض وتمسكوا فيني بقوة .. اطرافهم ووجيهم كانت باردة زادت من برودة جسمي .. حاولت ابعدهم عني شوي علشان اكلمهم لكن متعلقين فيني بقوة
وكل واحد منهم يجر طرف كوتي علشان يتدفى

قلت لهم اسألهم

انا :: ليش انتم برا بهالبرد ؟؟

ماردوا علي يتنافضون ويبكون ويهذون بالكلام مدري وش يقولون

ضميتهم لي اكثر احاول ادفيهم لكن انا بنفسي بردان

انا :: ياسر شهد ليش انتم بالحوش ؟؟

قال ياسر وهي يبكي

ياسر :: الصباح ارسلتني عمتي للبقالة وانا نسيت ورحت العب انا وشهد ورحنا لبيت ابو فيصل ونسيت ماجبت الخبز .. صدقني فارس نسيت

انا :: طيب هذا الصبح .. وحنا الحين المغرب

ياسر :: عيت تدخلنا البيت وقالت ياويلكم اذا طلعتم للشارع

شهد :: فارس انا جوعانه

ياسر :: وانا بعد

فار دمي وعصبت

انا :: والخبلة اختكم وينهي ليه ماتدخلكم ؟؟

ياسر :: مدري

قمت ورحت امشي بسرعة رايح لباب البيت الداخلي لكن كان مقفل .. ورحت لدريشة المطبخ واخواني وراي

من دريشة المطبخ .. شفت اختي بالمطبخ تمسح دموعها وهي تطبخ العشاء مدري تغسل الصحون ..

صرت بدل مااحس بالبرد احس بالحر ... منظر اختي زاد من عصبيتي ..

انا :: مااكون فارس ان ماوريتكم .. ان ماوريتك ياعم انت واهلك .. هين .. هين

صرت كأني اركض وانا رايح لدريشة غرفتي واخواني يركضون وراي

لقيت بالحوش مكنسة .. واخذت عصاها بس
دخلت البيت عن طريق دريشة غرفتي ودخلت اخواني بعد عن طريق الدريشة .. والعصا مازالت معاي

مشّوت مااشوف دربي .. ولد عمي صغير عمره سنتين كان على طريقي وانا ماشي

دزيته متعمد وطاح على خشمه وقعد يبكي

وصلت لهم

بنات عمي ثنتين اللي يتغطن عني ركضن لوحدة من الغرف وطلعن وهن متغطيات

اما مرة عمي لما شافتني تغطت بشيلتها وقالت

مرة عمي :: فويرس .. وش جابك يالصايع ؟؟

انا :: ومن خلاني صايع غيرك ؟؟

مرة عمي :: اطلع برا اشوف .. فارق

اختي اول ماسمعت صوتي جتني

اختي :: فارس وينك اسبوع ماجيت

لكن اول ماشافت ياسر وشهد راحت لهم تضمهم

سألت مرة عمي .. وانا اهز العصا قدامها

انا :: وين عمي ؟؟

مرة عمي :: مالك دخل .. اطلع برا

انا :: اطلع برا .. هااااه .. على كيفك هو .. وين عمي ؟؟

قالت اختي :: عمي مسافر له يومين واليوم اتصل يقول انه بيجي اليوم

انا :: حسافة كنت ناوي اخلّص عليه هو الاول ..

الحريم كلهن شهقن حتى اختي .. و تمنيت روح مرة عمي تطلع مع شهقتها

قلت لمرة عمي وانا اهز العصا

انا :: ليش مطلعة ياسر وشهد برا بهالبرد .. هاااه ؟؟

مرة عمي :: ............... .........

قال ياسر :: فارس نسيت .. علمتك انا .. علشان نسيت اجيب خبز

قلت لمرة عمي :: تبين خبز .. هاااه ؟؟ انا اعلمك وشلون تبين خبز ..

ورحت لمرة عمي وكشفت غطوتها وسحبت الشيلة عنها

وقعدت اضربها بالعصا .. قاومتني بالبداية وبعدين ضعفت .. وصرت اضرب واضرب

الصغيرة من اللي يتغطن من بنات عمي على طول انهارت وجلست بالارض تبكي .. جعلها ماقامت هذي راس المشاكل ودلوعة امها وابوها

اما الكبيرة الي اكبر مني بسنة .. تحاول تدافع عن امها ادزها وترجع .. ادزها وترجع .. اذتني ماخلتني اتفرغ لامها اكثر

انا بالبداية على بالي انها تهمزني اثرها تضربني دفاعا عن امها .. ادزها وترجع ..

ما تفرغت لامها الا لما تجاشرت اختي مع بنت عمي الكبيرة وياسر يساعد اختي بضرب بنت عمهم ..

ورجعت اضرب مرة عمي اكثر .. حسيت اني مجرم .. لكن هي اكثر اجرام مني .. مارحمتني يوم محتاج

وانا اضرب مرة عمي طرت ببالي فكرة شيطانية .. ابي احرق قلب عمي .. ابي اسوي الحرام مع مرة عمي يمكن احرق قلبه وعلشان يطلقها بعد .. واخذت افكر متردد .. اسوي الحرام والا مااسوي ..

فجأة صحتني من افكاري اختي .. والحمد الله انها صحتني ..

اختي :: فارس اخاف يجي عمي الحين .. اطلع الله يخليك

بنات عمي لهن جوالات كاميرا جدد سألت اختي

انا :: وين الجوالات ؟؟

راحت اختي وجابت جوالات بنات عمي وكان الجوالات ثنين بس .. لان مرة عمي ماطلعت جوال

قالت اختي

اختي :: اظن واحد فيه شحن بس الثاني مقطوع

اخذت الجوالات ناوي ابيع واحد واخذ الثاني يمكن احتاجه ورحت للتلفون وقطعت السلك .. شفت الكمبيوتر اللي بالصالة موصل بسلك شوي كبير .. ماكان موصل بسلك قبل يتهموني بالسرقة ويطردوني .. استغربت

سألت اختي بسرعة

انا :: وش السلك هذا ؟؟

اختي :: سلك الدي اس ال

انقهرت انا متشرد وهم يشتركون بدي اس ال ويمكن بالـ 2000 حقاتي

رحت للكمبيوتر وكسرت الشاشة لكن تحسفت بسرعة .. لو ماخذه ابيعه .. لكن فات .. وكملت عليه وقطعت اسلاكه

قالت اختي

اختي :: فارس ياخبل .. اطلع يمكن يجي عمي الحين

انا :: روحي البسي عباتك .. بنطلع كلنا

اختي :: هااااه

ولأن اللي ببطنه ريح مايستريح قلت لها

انا :: خلي نفسك حرمة كبيرة والبسي العباه

اختي :: وشلون يعني اخلي نفسي حرمة كبيرة ؟؟

انا :: يوووووووووووه روحي البسي وانتي ساكته

راحت اختي ولبست عباتها ..

انا لازم احبس اهل عمي بمكان علشان مايبلغون علي بسرعة

المطبخ هي الغرفة الوحيدة اللي لها مفتاح بس يمكن يطلعون من الدريشة .. والله البلشة

قلت مافيه الا الحمام اجل .. دريشته صغيرة وبعيدة ..

مرة عمي كانت طايحة بالارض تتألم .. سحبتها وحطيتها بالحمام وطلبت من اختي تاخذ البنات وتدخلهن الحمام بعد .. قاومن اختي بالبداية وحاولن يضربنها لكن بهزة وحدة بالعصا اللي معي .. دخلن وهن مايشوفن الدرب .. اكيد خايفات يصير لهن مثل ماصار لامهن ..

ودخلت بزارين عمي الباقين .. اللي نايم مايدري وين الله حاطه .. واللي يبكي

دخلتهم كلهم بالحمام وقفلت عليهم الباب .. يقولون عمي بيجي بعد شوي .. خله يشوف من هو فارس .. وان ماوريته هو الثاني .. مااكون فارس ..

رحت لغرفة عمي ومرته .. لأني تذكرت اني لازم اخذ كرت العايلة حقنا واخذ الاوراق اللي ترجعلي حقي وحق اخواني

فتحت الدواليب ولقيت اوراق وملفات واجد والصراحة ماعرفت وش لازم اخذ علشان يثبت حقي

لكن اخذت كرت العايلة وهو الاهم .. منه اقدر اطلع لي بطاقة احوال و اتوظف وملفي بالمدرسة اقدر اسحبه ..

قالت اختي :: فارس وش ناوي عليه انت ؟؟

مارديت عليها ادور بهالاوراق والملفات

اختي :: فارس اخاف عمي يجي الحين

انا :: تراك اذيتيني بعمك انتي .. يالله امشوا خلونا نطلع

وطلعوا وراي .. ركبنا سيارة فيصل .. الشارع كان فيه عيال الحارة .. حاولت اخلي نفسي طبيعي .. قفلت الباب وراي .. وكأن شيئا لم يكن

وسمعته يأذن العشا ..

طلعت بالسيارة من الحارة .. مدري وين اروح .. لو اني بلحالي كان رحت للاستراحة لكن الحين معاي اخواني

صرت امشي بالسيارة مدري وين اروح ومدري وش اسوي .. لما انتبهت للبنزين كان باقيله الربع ..

مامعاي شي اعبي السيارة .. علشان كذا وقفت عند وحدة من الحارات البعيدة شوي عن حارتنا .. محتار مدري شسوي .. والمشكلة ماقدر اروح للرياض اخاف يجي عمي الليلة ويكتشف وش سويت باهله ويبلغ علي قبل اوصل الرياض

قلت لاختي خايف
انا :: انتي متأكدة انه بيجي اليوم ؟؟ يمكن قال بكرة ؟؟

اختي :: لا .. هو اتصل عليهم وقال انه بيجي اليوم .. حتى قالوا لي اني احسبه بالعشاء واسوي له قهوة

قال ياسر :: فارس اشترلنا شي ابي آكل

شهد :: وانا بعد

آآآآه مدري وش اسوي .. جوعانين ولا ادري وين ننام الليلة وسيارة فيصل معاي مااقدر اروح فيها للرياض بعد

ياربي شسوي

قعدت ساكت واختي بعد ساكته

وياسر وشهد يعلقون على الرايح والجاي ويسولفون بسوالفهم البريئة وكل شوي يذكروني انهم جوعانين
ضاق صدري .. وش اسوي اروح اتسلف علشان نستاجر ؟؟ .. بس من وين اتسلف .. فيصل يكفي اني ماخذ سيارته وسعود مابي اروح له ..

فجأة بكت اختي شكلها حست بضيقة صدري وبحيرتي

قالت :: فارس انت ماتدري وين تودينا .. صح ؟؟

ماقدرت اتحمل .. بكيت .. حاولت اقول لها اني مامعي شي علشان استاجر لكن عجزت اتكلم .. وقعدت ابكي

ياسر وشهد لما شافوا اخوانهم الكبار يبكون بكوا

مر علينا خمس دقايق تقريبا وحنا الاربعة نبكي .. نزلت من السيارة ضايق صدري .. محتار مدري وين اروح .. لكن حسيت ان مخباتي ثقيلة تذكرت الجوالات انها معي .. انا ماني متعود على الجوال والحين صار معي اثنين

رجعت للسيارة وقلت لاختي

انا :: ايهم اللي فيه شحن ؟؟

اختي :: هذا .. امس شفتهم شروا له بطاقة

انا :: اجل ابتصل بفهد ابخليه يجينا علشان ياخذنا للرياض .. ماعندي الا هالحل .............. ((اقصد زوج اختي الكبيرة اللي بالرياض ))

فرحوا اخواني كلهم

وقعد ياسر وشهد يتذكرون اختي وعيالها حتى اختي دخلت جو معهم .. اما انا تذكرت ان رقم اختي المتزوجة وزوجها تحت سريري يعني لازم ارجع للبيت .. بس يمكن وصل عمي وبلغ علي وين اروح .. الله يستر ..
حركت السيارة رايح للبيت ... اختي لما عرفت اني رايح لبيت عمي قالت

اختي :: هذي حارتنا .. بتروح لبيت عمي .. خبل انت ؟؟

انا :: انتي الخبلة

اختي :: انت الخبل

شهد :: خلاص كلكم خبلون بس لا تتهاوشون

سكتنا انا واختي .. متوتر وخايف

وقفت عند راس حارتنا .. احاول اشوف سيارة عمي هنا او لا

قال ياسر يذكرني

ياسر :: فارس اشترلنا شي جوعاااان

ضربته منقهر منه

انا :: انت يالدب اسكت ازعجتني .. كلنا جوعانين .. ماقلنا شي

ياسر :: طيب انا جوعان ماكلت شي من الصباح

شهد :: ايه وانا بعد

قلت لاختي :: مااشوف سيارة عمك .. هو متى قال يجي ؟؟

اختي :: مدري هو اتصل قال انه بيجي اليوم وبس .. و هم قالوا لي سوي العشـ ..

قاطعتها فاضيلها تعيد الكلام

انا :: بس بس .. فهمت لا تعيدين .. بس قوليلي عمك وين ذلف ؟؟

اختي :: اللي فهمته انه معزوم بمكان بعيد بس مدري وين

شفت ساعة الجوال وكانت الساعة 9 في الليل

قلت لاخواني

انا :: خلوكم بالسيارة لا احد يطلع .. زين

اختي :: زين

انا :: ياسر لا تطلع .. انت بالذات ياويلك ان طلعت

ياسر :: طيب بتروح تشتري لنا شي ؟؟ .. ابنزل معك

انا :: اقول انثبر بس

نزلت من السيارة .. وشفت بالحارة اخو فيصل اللي بسادس كان بيدخل بيتهم اخذت منه رقم جوال فيصل

وحاولت ادخل بيت عمي لكن كان مقفل .. انا الغبي قفلته بعد ماطلعت منه .. ورجعت للسيارة مافيه الا اني احتري عمي .. اما اني اتسلق الجدار بهالوقت والحارة مليانه بالبزارين صعبة .. وخاصة بعد عملتي السودا ببيت عمي .. اليوم المغرب يوم تسلقت ماكان فيه احد بالحارة وان شاء الله مااحد شافني ..

ركبت السيارة وانا بديت اتعب مانمت امس واليوم .. وجوعان .. وما ادري وين اودي اخواني

اول ماركبت قال ياسر

ياسر :: وين ماجبت معك شي ؟؟

انا :: طيب .. طيب .. ابذلف الحين املي بطنك .. اسكت عني

ابروح ابيع الجوال قبل تسكر المحلات وان شاء الله اوصل البيت قبل يجي عمي

حاولت اسرع بالسيارة خايف يجي عمي وانا ماوصلت .. كنت ناوي اروح لمحلات الجوالات .. محل الطاير وطقته .. لكن لقيت محل جوالات على طريقي وبعت الجوال عنده بـ 600 ريال

هو يساوي اكثر لكن انا مستعجل ومالي نفس اخذ واعطي معه و اقوله زوّد

عبيت سيارة فيصل .. ومريت البوفية وشريت شاورما .. بس علشان اسكت ياسر وشهد

وطيرااااان لحارتنا .. اخواني كل واحد اكل سندويشته الا انا .. اولا لأني اسوق ثانيا مالي نفس .. خايف ان عمي وصل ويمديه بلغ الشرطة عني على اعتدائي بالضرب على مرته

لكن الحمد الله .. لما وصلت بيت عمي مالقيت سيارته .. يعني ماوصل

قلت لاختي

انا :: انا لو اعرف عمك هذا متى يجي

اختي :: وانت وش تبي فيه ؟؟ مو تقول ابتصل بفهد .. مااشوفك اتصلت

انا :: احتري عمك

اختي :: وليه ؟؟

انا :: قلتلك ابخلّص عليه .. مافيه قدامي الا كذا .. والا نسيتي وش سويت بمرته ؟؟

شهقت اختي مرة ثانية .. مدري ليه اذا قلت ابخلص عليه شهقوا .. مدري هم خايفين عليه او شسالفة

انا :: ليه خايفة عليه ؟؟

اختي :: لا .. بس اذا قتلته يقتلونك الشرطة مدري وش يسمونه اسمعهم بالاخبار اذا احد قتل واحد قتلوه الشرطة .. الله يخليك فارس لا تروح .. امانة امانة لا تروح له

تقصد القصاص .. اعوذ بالله

انا :: وانا قلت اني بذبحه ؟؟

اختي :: تقول ابخلص عليه

انا :: ايه .. ضرب بس

اختي :: طيب ليه .. اتصل بفهد وفكنا

انا :: اكلتي عشاك ؟؟

اختي :: ايه .. الحمد الله

انا :: اجل اسكتي

واحتريت هالعم اللي عيا لايجي .. جت الساعة 11 ونص وهو ماجا
وبدى يغلبني النعاس .. قلت لاخواني

انا :: اذا شفتوه علموني

تعبان ابي انام .. وغفيت شوي

لكن فجأة قوموني

اختي :: فارس مو هذي سيارة عمي ؟؟

قال ياسر يرد عليها

ياسر :: الا سيارة عمي

حمدت ربي ان الحارة فاضية لأن الساعة تقريبا 12 او 1 في الليل وبكرة امتحانات .. الكل يذاكر

نزلت انا من السيارة على طول لما شفت عمي يدخل البيت .... خفت يدخل الحمام ويشوف العايلة كلها هناك لحقته ودخلت وراه على طول

وصرنا بالحوش ..

اول ماشافني قال

عمي :: وش جابك انت .. انا ماني قايل مابي حرامي ببيتي

انا :: انا مب حرامي .. انت الحرامي

عمي :: شف تراني ماني فاضيلك توني جاي وتعبان .. يله انقلع برا

انا :: ماني منقلع .. وش بتسوي يعني ؟؟

تقرب مني يبي يضرب .. انا الصراحة خفت لكن خلاص تورطت .. وتشابكت معه واخذنا خمس دقايق تقريبا وحنا نتشاجر

اهب عليه .. مع انه عمره بالخمسين الا انه مازال قوي .. عجزت لغلبه

يمسك شعري ويطق راسي بالجدار .. لو اني محلق بالصفر قبل اواجهه .. دايما يمسك شعري

كل شوي يطق راسي بالجدار و يصفقني.. مرت فترة وحنا على هالحال .. اضربه بكل قوتي .. لين هو تعب و اخيرا طاح بالارض .. وقعد يترجاني

عمي :: خلاص خلاص وش تبي ارحم شيبتي

رديت عليه وانا منهد حيلي واحس الدنيا تدور .. بسبب الصداع

انا :: ارحم شيبتك ؟؟ مارحمتني يوم محتاجلك

ورجعت اضرب واضرب .. طلعت كل الغيض اللي بقلبي فيه .. ودست على بطنه مثل ماداس على بطني ذيك المرة ..

يوم شفته خلاص مايقدر يتحرك وهذا اللي ابيه

يالله يالله رحت لغرفتي مااشوف طريقي من قوة الصداع ..

اخذت الورقة اللي فيها الارقام .. ورجعت لعمي .. لقيته يتأوه ويتألم .. حاولت اسحبه علشان احبسه بالحمام الثاني .. لكن كان ثقيل بالنسبة لي وانا منهد حيلي ..

قلت له

انا :: تبيني اكمل عليك والا تمشي معي الحين ؟؟

عمي :: وين .. وين تبيني امشي ياوليدي انا وش سويتلك .. حرام عليك

اخذ ساعة علشان يقول هالكلمة

قلت له :: امش معي وانت ساكت

حاول يقوم وساعدته .. يالله يالله وصلته ودخلته الحمام وقفلت عليه .. قعد ينادي بترجي لكن ماهتميت

حسيت نفسي مجرم

لقيت شماغي طايح بالحوش تلثمت فيه وطلعت من البيت وقفلته .. انا بنفسي يالله يالله وصلت للسيارة .. الصداع بيفجر راسي .. اهب ياهو عليه طق

مشيت بالسيارة ووقفت عند حارة ثانية بعيدة شوي عن حارتنا .. مااقدر اتحمل راسي بينفجر

عطيت اختي الورقة وخليتها تتصل لي على فهد علشان اكلمه .. مااقدر اشوف الورقة من الصداع

طلبت من فهد يجينا وحددت له المكان .. المسكين قومناه من نومه وماقصر قال الحين جايكم

علمت اخواني ان فهد بيجي الحين ونروح للرياض فرحوا كلهم .. وانا بعد

اذكر مرة قال لي سعود انه المسافة بين القصيم والرياض 3 ساعات .. شفت الجوال وكانت الساعة 1

يعني يجي فهد على الساعة 3 ان شاء الله او 3 ونص

مازلت مصدع وجوعان

قالت اختي لي

اختي :: وشفيك فارس ؟؟

انا :: راسي يعورني وابي اكل شي

اختي :: انت ماكلت سندويشتك .. خذ كلها

ومدتها لي .. نطت شهد تهاوش اختها

شهد :: يوووووه ليش علمتيه .. انا قلتلك اذا نساها باكلها انا

اختي :: اسكتي انتي يالدوبية .. ماتشبعين .. توك ماكله

عطيت شهد الربع واكلت الباقي .. بعد ماخلصت نمت بالسيارة لين يجي فهد

لكن قمت بعد ساعتين .. والحمد الله شوي خف الصداع عني .. انتبهت لاخواني لقيت ياسر وشهد نايمين ماعدا اختي

سألتها

انا :: انتي مانمتي ابد ؟؟

اختي :: ايه .. ليه خلتوني بلحالي ؟؟

انا :: وش ؟؟

اختي :: الشوارع فاضيه مافيها احد .. يخوّف .. وانتم نايمين

انا :: ليه .. خفتي ؟؟ تدرين .. انا هذي ثاني مرة انام فيها بسيارة فيصل والشوارع فاضية وماحد معاي

اختي :: طيب اتصل على فهد وشفه وينه ملينا وحنا بالسيارة ظهري عورني من كثر الجلوس

اتصلت على فهد اشوفه وينه وقال انه قريب

سألتني

اختي :: وش سويت بعمي ؟؟

انا :: ماسويت فيه شي

اختي :: لا عاد قلي وش سويت ؟؟

انا :: حطيته بالمكان المناسب

اختي :: وين ؟؟

انا :: حبسته بالحمام الثاني

سكتنا كلنا واخيرا اتصل فهد وعلمته وين مكاننا بالضبط .. وقومت ياسر وشهد

وقلت لاخواني

انا :: لا تقولون لفهد وش سوينا باهل عمي .. اسكتوا .. انا بس اللي اتكلم .. مفهوم

ماحد رد علي

انا :: تسمعون ؟؟

كلهم :: زين

وجانا فهد وكذبت عليه بأن عمي سمح لنا بأننا نروح للرياض .. استغرب

فهد :: غريبة .. طيب وش موقفكم بالشارع ؟؟ ومن سيارته هذي ؟؟ وليش ماحتريتوني ببيت عمكم ؟؟

تورطت مدري وش اقول

انا :: هذي سيارة فيصل .. وانا الحين ابتصل عليه علشان ياخذ سيارته بس كنت احتريك

فهد :: وش موقفكم هنا ؟؟ وليش مامعكم شنط ؟؟

انا :: معاي كرت العايلة وهو الاهم

فهد :: طيب ماجاوبتني وش موقفكم هنا

قلت مافيه الا اني ارقع الكذبة بكذبة ثانية

انا :: تبي الصراحة .. عمي طردنا .. وقال روحوا لخوالكم

فهد :: حسبي الله ونعم الوكيل .. خلاص اريح لكم بعد .. بس بنمره ناخذ ثيابكم .. ماهو على كيفه يطردكم كذا

انا :: هااه .. لا لا لا .. مب لازم بنشتري من الرياض

فهد :: وشلون مب لازم ؟؟ حلوة ذي يطردكم بدون ملابس .. وش هالعم

انا :: ماعليه فهد ماعليه .. خلنا نروح للرياض .. مو لازم نمره

سكت ماقال شي لكن ظل مستغرب وكل شوي يحقق معي

واتصلت بفيصل وقلت ياخذ سيارته بالمكان الفلاني واستسمحت منه

واخيرا توجهنا للرياض .. بدون مانمر عمي

هناك بالرياض ولما تأكدت اني ببيت فهد (( بيت اختي )) اللي اول مرة اشوفه علمته بعمايلي بعمي واهله وانهم محبوسين الى الحين بالحمامات

فهد عصب علي وقعد يهاوشني وقعد يعددلي عواقب اللي سويته لكن مااهتميت بااحتمي بخوالي .. وماعلي من احد

ورجع المسكين مرة ثانية للقصيم ..

اختي المتزوجة قعدت تهاوشني على اللي سويته وهاوشت اختي بعد لانها ساعدتني .. لكن سكتناها بكلمة وحدة ..... == ماذقتي اللي ذقناه == ....

لكن فرحتها ماتوصف لدرجة انها مادرت ان زوجها رجع للقصيم الا بعد ماعلمناها

بعد ساعات من وصولنا للرياض تقريبا الساعة 10 الصباح اتصل فهد وعلمنا ان طلّع عمي واهله من الحمامات

ويقول ان عمي يتوعدني .. الله يستر .. متى افتك من هالعم متى ؟؟

وعلى اذان الظهر وصل فهد وعلمنا بالتفاصيل

مرة عمي دخلت المستشفى بسبب الضرب اللي جاها وولد عمي اللي عمره سنتين بعد دخلوه المستشفى لكن مدري وش فيه اظن من حبس الحمام

اما البقية ماجاهم شي حتى عمي .. انقهرت ان عمي ماجاه شي شكله ماتعور من ضربي له

لكن قضينا اليوم باكمله ببيت اختي مرتاحين ومستانسين

اذكر من زود وناسة اختي (( اللي ماهي متزوجة )) جتني وقالت لي

اختي :: فارس ماتلاحظ شي ؟؟

انا :: وش ؟؟

اختي :: اليوم مادخلت المطبخ

وحركت حواجبها لي

قلت لها اعاندها

انا :: اجل روحي هاتيلي ماء

ماردت علي وراحت عني .. تأثرت من كلمتها ( اليوم مادخلت المطبخ ) شكلها فرحانه مرررة ..

وانا فرحان ..بس خايف .. فهد يقول عمي يقدر ياخذهم .. الله ياخذك ياعمي

اما اختي الكبيرة ظلت اليوم كله خايفة علي من عمي وكل شوي تجيب شكوك

اكيد بيشككي عليك .. واكيد بيجي ياخذكم مرة ثانية .. يمديه بلغ الشرطة على اعتدائك ..

ادوختني بشكوكها .. عمي مايقدر ياخذ اخواني مني انا اكبرهم وابصير الوصي عليهم وهو ماله دخل فينا .. اما اذا بلغ الشرطة باحتمي بخوالي ويادار مادخلك شر

اليوم اللي بعده جاني فهد وعلمني ان عمي بطريقه للرياض واني لازم اروح لخوالي الحين

اليوم اللي بعده جاني فهد وعلمني ان عمي بطريقه للرياض واني لازم اروح لخوالي الحين

الكلب يعني لازم يجي .. انا على بالي بيبلغ الشرطة على اعتدائي بالضرب على زوجته المصون

وسألت فهد

انا :: ليش يجي كان بلغ شرطة القصيم وخلاص

فهد :: عمك يمكن جاي ياخذ اخوانك .. وخاصة البنات

انا :: مب على كيفه .. اخواني صاروا معاي .. انا الوصي عليهم

فهد :: انت قاصر

حسبته يسب

انا :: انت اللي قاصر

فهد :: رجال متزوج وعندي عيال وتقولي قاصر .. تدري كم عمرك ؟؟

انا :: 17 .. بس ماعليك بدخل بـالـ 18

فهد :: لا والله احلف بس .. انت قاصر مالك حق الوصاية على اخوانك

انا :: ليه ؟؟ انا اكبرهم

فهد :: اكبرهم بس قاصر

انا :: ماني قاصر .. افهم كل شي

فهد :: تفهم بس قاصر

انا :: طيب انا طولك يعني ماني قاصر

فهد :: صدق انك ورع .. امش امش خلنا نروح لخوالك الحين يجي عمك

قلت لفهد اترجاه

انا :: فهد .. البهذله اللي مريت فيها كلها بسبب اخواني والا انا لو اني بلحالي كان من زمان هربت من عمي

مارد علي فهد .. طلع .. ولحقته .. ابغاه يفهمني

انا :: فهد اصبر اسمعني .. عمي دايم يطردني وارجع بس علشان اخواني واخر شي تقولي قاصر

فهد :: فارس .. الله يهديك .. مابيدنا شي .. عمك وليكم

انا :: انا ولي نفسي

فهد :: بس مانت ولي على اخوانك .. لانك اصلا مانت ولي نفسك انت قاصر تفهم .. قااااااصر

انا :: ماني قاصر ..

مارد علي .. كمل مشيه .. قربت ابكي منقهر .. ماني قاصر

ليتني ذابحه ومفتك منه

اول ماركبنا سيارة فهد .. خافوا اخواني الثلاثة .. على بالهم انهم بيرجعون لعمي

قالوا يترجوني

شهد :: فارس خلنا هنا مانبي نرجع .. (( وتمسكت فيني وقعد تبكي )) فارس ماحنا راجعين صح ؟؟

اما ياسر عيا يركب السيارة

فهد تأثر .. ويالله يالله هديناهم ..

المهم رحنا لبيت خوالي .. خوالي ثلاثة اكبرهم خالي عبد الرحمن شايب وله عيال كبار واصغر خوالي متزوج بعد ..

اذكر اخر مرة زرتهم كنت مع امي وابوي يوم كنت بسادس

ووصل عمي لبيت خوالي اول ماشافني تهجم علي يبي يضربني على اللي سويته .. لكن خوالي دافعوا عني

عمي اخذ يطالب ويتوعدني بالسجن لأعتدائي على مرته وانه يبي ياخذ اخواني لكن هدوه خوالي وقالوا خلنا نحل المشكلة وديا ..

وجلسوا واخذوا نص ساعة يتناقشون في امري وامر اخواني ويحاولون في عمي انه مايبلغ .. واذا تكلمت سكتوني

قال عمي لي ينهي النقاش

عمي :: انا اخوانك اقدر اخذهم بسهولة بس اذا كنت ماتبيني ابلغ عنك لا تطالب براتب اخوي

انا :: اخوك ابوي .. واخواني ماتاخذهم وراتب ابوي اباخذه غصب عنك

عمي :: اجل ابلغ عنك

صارخت فيه منقهر

انا :: بلغ

خالي عبد الرحمن :: فارس ياولدي اسكت خلنا نتفاهم

عمي :: اذا بلغت عليك اخذت اخوانك والصراحة انا مابيهم فاحسن لك انك تتنازل عن الراتب وانا اتنازل عن التبليغ وعن اخوانك بعد .. هااه وش قلت ؟؟

قال خالي عبد الرحمن

خالي عبد الرحمن :: هذا مال ايتام .. اتق الله

استغربت تمسك عمي براتب ابوي .. انا اذكر ان ابوي اذا بغى يروح لشغله يلبس بدله يعني عسكري لما كبرت سألت عمي عن رتبة ابوي وقال انه جندي طيب ليه متمسك براتبه لهالدرجة وهو قليل

رجع عمي يسألني

عمي :: هاااه اخذ اخوانك والا تسكت عن ورثك ؟؟

انا :: قلتلك اخواني لي وماراح اتنازل عن الراتب

قام عمي وقال لخالي عبد الرحمن

عمي :: اجل انا رايح للشرطة

خالي عبد الرحمن :: استهد بالله يارجال هذا يتيم وبعدين وش تستفيد اذا سجنت الولد

قال فهد معصب

فهد :: يستفيد انه ياخذ مال اليتاما .. حرام عليك خاف الله فيهم

سألت عمي مستغرب

انا :: عمي أنت ليش متمسك براتب ابوي وهو مجرد جندي

قال فهد

فهد :: وش جنديه انت الثاني ابوك كان ضابط

ضابط .. ابوي كان ضابط .. يعني كل هالسنين متشرد ومحروم وانا ابوي ضابط

صارخت على عمي منقهر

انا :: يالكذاب يالكلب شردتني وجوعتني وجوعت اخواني وخليتني محروم وناقص بين اصحابي وابوي ضابط .. ليه طيب ؟؟ وش سويت لك انا .. ياما نمت بسيارة فيصل .. ياما تنطز..

لكن عجزت اكمل بكيت غصب عني .. قهرني هالعم

خالي الاصغر وواحد من عيال خالي عبد الرحمن جو عندي علشان يهدوني

قعدت ابكي السنين

تذكرت كيف كان يطردني .. تذكرت الايام اللي انام فيها بردان وجوعان .. تذكرت تنظز شباب المدرسة علي ..تذكرت ضربه لي الدايم .. ياما تمنيت اشياء كان يمنعني عنها دايما يقول مامعي .. واثر معه فلوس ابوي ..حقي وحق اخواني .. معه راتب ضابط ويقول مامعي هذا غير راتبه هو

سمعت خالي عبد الرحمن يقول لعياله

خالي عبد الرحمن :: لا حول ولا قوة الا بالله .. فارس ادخل ياولدي ارتاح .. طلعوه عن المجلس خلوه يدخل البيت

قمت ابي اروح .. مابي اشوف خشت عمي .. لكن وقفني عمي بكلامه

عمي :: خلوه هو عندكم لكن نادوا لي ياسر و البنات برجع للقصيم

فهد :: خل البنات وياسر عند اختهم

عمي :: البنات مايصح يجلسن ببيت رجال غريب

خالي عبد الرحمن :: ماهن جالسات ببيت فهد بيجلسن عندي انا خالهم

عمي :: لا .. انا عمهم وانا وليهم

ورجعوا يتناقشون مرة ثانية .. ورجع عمي يقول لي

عمي :: تبي اخوانك ؟؟

انا :: ايه

عمي :: وتسكت عن ورثك ؟؟

انا :: لا

عمي :: تراني اقدر اخذ اخوانك لأنك قاصر .. واذا كنت تبيهم ..تنازل عن ورثك

انا :: لا .. ماني متنازل .. وانا ماني قاصر .. وانت تاكل تبن

عاتبوني خوالي على الكلمة الاخيرة اللي قلتها لعمي

ثنين من عيال خالي عبد الرحمن مطاوعة قعدوا يحدثون على عمي ان هذا مال ايتام وحرام اللي يسويه فينا

جاني فهد يقولي ان اختي ( زوجته ) تبيني اطلع لها بالمجلس الثاني

رحت للمجلس الثاني وانا منقهر من هالعم .. ليتني خليته يعفن بالحمام ..

اخواني دايما كاسرين ظهري .. حتى وانا اطالب بحقي

لقيت كل اخواني يحتروني هناك

لما شفت اختي اللي عانت معاي .. قلت لها

انا :: شايفه عمك .. من زمان يكذب علينا يقول ان ابوي جندي وهو ضابط .. كل ماطلبنا منه شي قال مامعاي .. كذااااب

امسكتني اختي الكبيرة وقالت لي

اختي :: فارس الله يهديك .. لا تبكي وانا اختك

انا :: شسوي قهرني

أختي :: ادري .. حسبي الله عليه .. انا سمعت كل شي .. هد اعصابك ياخوي .. بينبح صوتك من قو صراخك

انا :: قوليلي وش اسوي يبي ياخذ اخواني او اتنازل عن راتب ابوي .. وانا ابيهم كلهم

ياسر وشهد بكوا لما شافوني ابكي

اختي :: فارس ياعمري انت .. حقك وحق اخواني تقدر تاخذه غصب عنه بس سايره انت الحين خذه على قد عقله .. الحين خلنا نحل مشكلة اخواني .. انت مشكلتك انك قاصر يعني مافيه ولي غير عمك .. فهمت ؟؟

انا :: حتى انتي تقوليلي قاصر

اختي :: لا لا انت عاقل وفاهم وذكي وكل شي بس لاتعصب .. واسمعني للاخير

انا :: مابي اسمع شي

اختي :: انت نسيت ان لي شي من ورث ابوي .. عمي تراه ناسيني الحين .. انا قبل ساكته لأنكم انتم عنده .. اذا تنازل هو عن اخواني .. واستقريتوا عندنا .. ساعتها ابطالب بحقي .. ومايقدر يطالب باخواني مرة ثانية لأنك انت متنازل عن حقك في الورث حسب الاتفاق .. ومايقدر يقول شي.... صح شوي من راتب ابوي اللي يرجع لنا .. لكن مؤقت لين تكبر انت .. بعدين انت اذا كبرت تقدر تاخذ اللي تبيه من المحكمة

انا :: وشلون يعني .. طيب واذا كبرت ؟؟

اختي :: وشلون واذا كبرت ؟؟ اذا كبرت انت يصير من حقك وصاية اخوانك وورث ابوي يرجع لك غصب عن عمي .. تطالب به بالمحكمة او ودي المهم يرجع لك ولاخواني .. واتحداه يقول شي .. صح والا لا ؟؟

انا :: طيب واذا تنازلت من وين لنا شي ؟؟

اختي :: افاا ياخوي .. اولا انتم بتصيرون بالرياض يعني عندي وماني مقصره عنكم بشي .. ثانيا خوالي بعد ماراح يقصرون ..

انا :: ماني ساكن عند خوالي أخاف هم بعد مثل عمي

اختي :: طيب طيب انت الحين خلص اخواني من هالعم ثم يصير خير

انا :: طيب كم باقيلي وماتقولون لي قاصر مرة ثانية

اختي :: مدري اظن اذا جا عمرك 20 او 21

انا :: وييييين بعيد ..

وقعدت اعد

انا :: 17 .. 18 .. 19 .. 20 .. ويييين واجد .. اربع سنين .. خليه على 18 يصير بس سنتين ..

اختي :: لا حول ولا قوة الا بالله .. فارس انا يوم انتم صغار طالبت فيكم بالمحكمة لكن القاضي حكم انكم بوصاية عمي .. والحين اذا وصلت السالفة للمحكمة بيقضي القاضي ان اخواني بوصاية عمي مرة ثانية لأنك مازلت قاصر ..وايهم اهم اخواني والا الورث ؟؟

انا :: ليتني ذابحه ذيك المرة

اختي :: لا تقول كذا الله يخليك لي .. يله ارجع للمجلس وسو اللي قلت .. المهم ماتوصل السالفة للشرطة انا صدقني خايفة يبلغ عليك .. انت بس لو مااعتديت على عمتي .. حنا بألف خير

قلت لها معصب

انا :: لا تقولين عمتي .. اشوف استغفري استغفري

اختي :: استغفر ؟؟ ليه قلت شي حرام انا

انا من القهر قلت تستغفر والا وش دخله الاستغفار

اختي :: فارس .. ياخوي رح للمجلس وحاول انك ماتبين له انك ناوي تطالب بحقك بعدين .. المهم الحين اخواني نفكهم من هالعم .. خلنا نفتك من هالمشكلة

اقتنعت بكلام اختي لكن القهر مالي قلبي

رجعت للمجلس لكن مانتبهت ان ياسر وشهد وراي

اول مادخلت المجلس

قال عمي :: ياسر شهد تعالوا سلموا علي

لما انتبهت انهم وراي هاوشتهم

انا :: وشوله جيتوا وراي ..يله ارجعوا

عمي :: خلهم يسلمون علي .. علشان اخذهم

سحبت ياسر وشهد وطلعتهم برا المجلس

وقلت له

انا :: خلاص انا متنازل بس انت تنازل عن اخواني

عمي :: و ماتطالب بورث ابوك ؟؟

انا :: جعله سم ببطنك

قال خالي عبد الرحمن لعمي :: اتق الله ..تاكل مال ايتام .. خاف الله .. لا تنسى ان الله فوق

عمي :: انا ماقلت شي هو تنازل عن ورثه

قال خالي الاوسط :: مهدد الولد باخوانه وتقول ماقلت شي .. لكن الله حسيبك وين تروح

خفت انه يطلب يوقعني على ورقة او شي بعدها صدق مااقدر اطالب بحقي

فبديت بالهجوم

انا :: يله انقلع .. خوالي مايدخلون بيتهم حرامي

عصب علي خالي عبد الرحمن لاني اطرده من بيته

خالي عبد الرحمن :: فارس وش هالكلام

انا :: ترا بالدله الحين على راسه خلوه يذلف

اخيرا تكلم واحد من الشباب اللي في مثل سني ..

قال :: ياجماعة انا اشوف انه يطلع احسن .. اخذ اللي يبي وخلاص

كانوا كل الشباب اللي بالمجلس طول الفترة اللي راحت مايتدخلون بالكلام الا ثنين من عيال خالي عبد الرحمن المطاوعة

وبعد ماتدخل هذا .. تدخلوا الشباب الباقين وصار كل واحد يبدى رايه واجمعوا انه مايقعد

واخيرا طلع عمي وسافر للقصيم

وصرت انا واخواني ببيت خالي عبد الرحمن ..

رفضت بالبداية ان اسكن عند احد لكن عيت اختي الكبيرة وخوالي اننا نسكن ببيت بلحالنا .. لاني بعينهم صغير

بعدها بدينا انا واخواني نستقر .. طلعت بطاقة احوال وسحبت ملفي وملفات اخواني من مدارسنا بالقصيم .. من دون ماامر على عمي ولا حتى حارتنا ..

و كل يوم أسأل متى من حقي الوصاية على اخواني ..

لكن الاجوبة تختلف .. منهم من يقول 20 ومنهم من يقول 22 ..

ماوراي الا الصبر

واصريت على البحث عن وظيفة حتى ماتتكرر معاناتي ومعاناة اخواني في بيت خوالي ..

::
::
::
::

والان و بعد مرور سنه

انا (( فارس )) عمري 18 .. انتظر حقي في الوصاية .. حتى استطيع استرجع حقي المالي المسلوب .. بثاني ثانوي مع وظيفتي الليلية كاشير

اختي بثالث متوسط ............... ... ومازال وليها عمها ووليها الحقيقي قاصر بعين الكل

ياسر وشهد بثاني ابتدائي ............... ........ ولا ينقصهم شي

لكن والأهم

لنا حريتنا

وحقي اخذه ولو بعد حين

حقا حقك ستأخذه ولو بعد حين

لكن ينقصك الوقت يأغلى قاصر